មនុស្សជាង ៣.០០០នាក់ ត្រូវបានគេជឿថា ត្រូវបានសម្លាប់នៅទូទាំងអ៊ីរ៉ង់ រហូតមកដល់ពេលនេះ ហើយមន្ទីរបញ្ចកោណ បញ្ជាក់ថា គោលដៅជាង ១៥.០០០កន្លែង នៅក្នុងប្រទេសនេះ ត្រូវបានវាយប្រហារក្នុងរយៈពេល ២សប្តាហ៍ដំបូង។

សង្គ្រាមនេះ បានធ្វើឲ្យសាលារៀនក្មេងស្រីមួយកន្លែង នៅក្នុងទីក្រុង Minab ភាគអាគ្នេយ៍អ៊ីរ៉ង់ ស្ថិតនៅក្នុងគំនរបាក់បែក ដោយមានកុមារ និងគ្រូបង្រៀនប្រហែល ១៧៥នាក់ បានបាត់បង់ជីវិត នៅក្នុងការវាយប្រហារមួយដែលត្រូវបានគេជឿថា ត្រូវបានធ្វើដោយសហរដ្ឋអាមេរិក។ ហើយច្រកសមុទ្រ Hormuz ដែលជាផ្លូវសមុទ្រដ៏តូចចង្អៀត សម្រាប់ការដឹកជញ្ជូនប្រេងរបស់ឈូងសមុទ្រ និងពិភពលោក ត្រូវបានបិទ។

ហើយបើយោងតាមអ្នកវិភាគនៅមជ្ឈមណ្ឌលសិក្សាយុទ្ធសាស្ត្រ និងអន្តរជាតិ (CSIS) បានឲ្យដឹងថា ការចំណាយកំពុងកើនឡើងប្រហែលកន្លះពាន់លានដុល្លារជារៀងរាល់ថ្ងៃ។ មួយសប្តាហ៍ បន្ទាប់ពីកងកម្លាំងអាមេរិក និងអ៊ីស្រាអែល បានចាប់ផ្តើមការវាយប្រហាររបស់ពួកគេ លើអ៊ីរ៉ង់ និងថ្នាក់ដឹកនាំរបស់ប្រទេសនេះជាបន្តបន្ទាប់ មន្ត្រីមន្ទីរបញ្ចកោណ បានប្រាប់សមាជិកសភាអំឡុងពេលរាយការណ៍ដោយបិទទ្វារថា ការចំណាយលើសង្គ្រាមនេះ បានលើសពី ១១,៣ពាន់លានដុល្លាររួចហើយ ក្នុងរយៈពេល ៦ថ្ងៃដំបូង។

ប៉ុន្តែតួលេខនោះគ្រាន់តែជាផ្នែកមួយនៃការរាយការណ៍ប៉ុណ្ណោះ ដោយប្រភពដែលដឹងពីខ្លឹមសារនៃការរាយការណ៍នោះ បានប្រាប់សារព័ត៌មាន The Guardian ថា ការប៉ាន់ប្រមាណហាក់ដូចជាកំណត់តែចំពោះការចំណាយលើគ្រាប់រំសេវ ពោលគឺមិនមែនការចំណាយពេញលេញ នៅប៉ុន្មានថ្ងៃបើកឆាកនៃជម្លោះនេះឡើយ ដែលអាចរួមបញ្ចូលការដាក់ពង្រាយកងកម្លាំងទៅកាន់តំបន់ ការចំណាយលើការព្យាបាល និងការជំនួសយន្តហោះយោធាខូចខាច នៅក្នុងសមរភូមិ។

នៅថ្ងៃទី៦ CSIS បានដាក់ការចំណាយសរុបចំនួន ១២,៧ពាន់លានដុល្លារ។ តែពេលនេះ វាទំនងជាឡើងលើសពី ១៨ពាន់លានដុល្លារហើយ ដោយសទ្ទស្សន៍តាមដានតួលេខការចំណាយនៅតែរត់ឡើងជាលំដាប់៕