ទីភ្នាក់ងារសារព័ត៌មានអ៊ីរ៉ង់មួយបានចេញផ្សាយវីដេអូកាលពីថ្ងៃសុក្រ អំពីកងឆ្មាំបដិវត្តន៍អ៊ីស្លាមរបស់ប្រទេស បានបាញ់មីស៊ីលចេញពីទីតាំងដែលមិនបានបង្ហាញឱ្យដឹង ខណៈសង្គ្រាមរបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ មិនបានបង្ហាញសញ្ញានៃការបញ្ចប់នោះទេ។ 

ក្រុមហ៊ុនប្រេងរដ្ឋរបស់ប្រទេសគុយវ៉ែត បាននិយាយថា រោងចក្រចម្រាញ់ប្រេងមួយកន្លែងបានរងការវាយប្រហារដោយយានដ្រូនជាច្រើនលើក ដែលធ្វើឱ្យទីតាំងមួយចំនួនឆាបឆេះ។

ទន្ទឹមនឹងនេះ បំណែកគ្រាប់ពីមីស៊ីលអ៊ីរ៉ង់ បានបំផ្លាញតំបន់លំនៅឋាននៅទីក្រុង Rehovot របស់អ៊ីស្រាអែល។ យោធាអ៊ីស្រាអែលបាននិយាយថា ខ្លួនបានវាយប្រហារទីតាំងរដ្ឋាភិបាលនៅទីក្រុងតេអេរ៉ង់ ហើយទូរទស្សន៍រដ្ឋអ៊ីរ៉ង់បាននិយាយថា អនុប្រធានទំនាក់ទំនងសាធារណៈរបស់កងឆ្មាំបដិវត្តអ៊ីស្លាម(IRGC) ត្រូវបានសម្លាប់។ ការវាយប្រហារជាបន្តបន្ទាប់ បានកើតឡើងនៅពេលដែលសង្គ្រាមបានចាប់ផ្តើមដោយសហរដ្ឋអាមេរិក និងអ៊ីស្រាអែល ចូលដល់សប្តាហ៍ទីបួនរបស់ខ្លួន។

ប្រធានាធិបតីសហរដ្ឋអាមេរិក លោកដូណាល់ ត្រាំ បានបញ្ជាក់ជាថ្មីនូវការអំពាវនាវឱ្យសម្ព័ន្ធមិត្តជួយធានាដល់ការដឹកជញ្ជូនឆ្លងកាត់ច្រកសមុទ្រ Hormuz។ ការគំរាមកំហែងរបស់អ៊ីរ៉ង់ក្នុងការវាយប្រហារលើនាវាបានបិទលំហូរប្រេង និងឧស្ម័នធម្មជាតិរាវចំនួន២០ភាគរយរបស់ពិភពលោក។