ភ្នំពេញ៖ កម្លាំងនគរបាលការិយាល័យព្រហ្មទណ្ឌកម្រិតស្រាល សហការជាមួយកម្លាំងនគរបាលខណ្ឌពោធិ៍សែនជ័យ បានបើកការស្រាវជ្រាវ តាមទៅបង្ក្រាបមុខសញ្ញាប្រើហិង្សាវាយប្លន់ម៉ូតូចំនួន០៤នាក់ ក្រោយពួកគេធ្វើសកម្មភាពវាយប្លន់ម៉ូតូហុងដាស្គុបពីមួយគ្រឿងពីស្ត្រីម្នាក់បានសម្រេច កាលពីថ្ងៃទី១៧ ខែមីនា ឆ្នាំ២០២៦កន្លងទៅ ក្នុងមូលដ្ឋានខណ្ឌពោធិ៍សែនជ័យ ។

ការបង្ក្រាបនេះធ្វើឡើង ក្រោមបទបញ្ជារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដោយបង្ក្រាបក្រុមជនសង្ស័យនៅថ្ងៃទី២០ ខែមីនា ឆ្នាំ២០២៦ នៅចំណុចបន្ទប់ជួលលេខ១០ ផ្លូវបេតុង ស្ថិតក្នុងភូមិកាកាប សង្កាត់កាកាប២ ខណ្ឌពោធិ៍សែនជ័យ រាជធានីភ្នំពេញ ។

ជនសង្ស័យទាំង០៤នាក់ មានឈ្មោះ ភោគ សំណាង ភេទប្រុស អាយុ២២ឆ្នាំ, ទី០២ ឈ្មោះណា ទិត្យ ភេទប្រុស អាយុ២៥ឆ្នាំ , ទី០៣ឈ្មោះ ហៀប គន្ធា ភេទប្រុស អាយុ៤៣ឆ្នាំ , និងទី០៤ឈ្មោះ ឆាយ រតនា ភេទប្រុស អាយុ៣៣ឆ្នាំ ។

ក្នុងការបង្ក្រាប សមត្ថកិច្ចដកហូតបាន ម៉ូតូ០៦គ្រឿង , គ្រឿងញៀនមួយចំនួន , ដាវមួយចំនួនធំ និងវត្ថុតាងពាក់ព័ន្ធជាច្រើនទៀតផងដែរ ។ បច្ចុប្បន្នក្រុមជនសង្ស័យ ត្រូវឃុំខ្លួនបណ្តោះអាសន្ននៅស្នងការដ្ឋាននគរបាលរាជធានីភ្នំពេញ រងចាំកសាងសំណុំរឿង បញ្ចូនទៅតុលាការចាត់ការទៅតាមនីតិវិធីច្បាប់នៅពេលខាងមុខ ៕ លីហេង