អ៊ីរ៉ង់ បាននិយាយកាលពីថ្ងៃអាទិត្យ ២២ មីនា ថា ខ្លួននឹងវាយប្រហារប្រព័ន្ធថាមពល និងទឹករបស់ប្រទេសជិតខាងឈូងសមុទ្ររបស់ខ្លួនជាការសងសឹក ប្រសិនបើប្រធានាធិបតីអាមេរិក Donald Trump ធ្វើតាមការគំរាមកំហែងមួយកាលពីមួយថ្ងៃមុន ក្នុងការវាយប្រហារបណ្តាញអគ្គិសនីរបស់អ៊ីរ៉ង់ក្នុងរយៈពេល ៤៨ ម៉ោង ដែលធ្វើឲ្យសង្គ្រាមរយៈពេលជាងបីសប្តាហ៍កាន់តែធ្ងន់ធ្ងរឡើង។     

ការរំពឹងទុកនៃការវាយប្រហារសងសឹកលើហេដ្ឋារចនាសម្ព័ន្ធស៊ីវិល អាចធ្វើឲ្យទីផ្សារពិភពលោករង្គោះរង្គើបន្ថែមទៀត នៅពេលផ្សារភាគហ៊ុនសកលបើកឡើងវិញនៅព្រឹកថ្ងៃចន្ទ២៣មីនានេះ និងគំរាមកំហែងដល់ជីវភាពរស់នៅរបស់ជនស៊ីវិលរាប់លាននាក់នៅក្នុងតំបន់ ដែលពឹងផ្អែកស្ទើរតែទាំងស្រុងក្នុងករណីខ្លះលើរោងចក្រចម្រោះទឹកប្រៃ។

បន្ទាប់ពីការទម្លាក់គ្រាប់បែកយ៉ាងខ្លាំងជាងបីសប្តាហ៍របស់សហរដ្ឋអាមេរិក និងអ៊ីស្រាអែល ដែលមន្ត្រីនិយាយថា បានកាត់បន្ថយសមត្ថភាពមីស៊ីលរបស់អ៊ីរ៉ង់យ៉ាងខ្លាំង ទីក្រុងតេអេរ៉ង់នៅតែបន្តបង្ហាញពីសមត្ថភាពក្នុងការអនុវត្តការវាយបក។

សំឡេងស៊ីរ៉ែនប្រកាសអាសន្នពីការវាយប្រហារតាមអាកាសបានបន្លឺឡើងនៅទូទាំងតំបន់ភាគខាងជើង និងកណ្តាលអ៊ីស្រាអែល រួមទាំងនៅទីក្រុង តេលអាវីវ (Tel Aviv)និងតំបន់ West Bankកាន់កាប់ដោយអ៊ីស្រាអែល កាលពីយប់ថ្ងៃអាទិត្យ ដោយព្រមានពីការបាញ់មីស៊ីលបន្ថែមទៀតពីអ៊ីរ៉ង់។

ប៉ុន្មានម៉ោងមុននេះ យោធាអ៊ីស្រាអែលបាននិយាយថា ខ្លួនបានបញ្ចប់ការវាយប្រហារជាច្រើនលើកលើទីក្រុងតេអេរ៉ង់ ដែលកំណត់គោលដៅលើមូលដ្ឋានយោធា ក៏ដូចជាទីតាំងផលិត និងផ្ទុកអាវុធ។

លោក Trump បានចេញការព្រមានកាលពីល្ងាចថ្ងៃសៅរ៍ មិនដល់មួយថ្ងៃផង ក្រោយបង្ហើបថាអាមេរិកអាចពិចារណាបញ្ចប់ជម្លោះបណ្ដើរៗ ទោះកងទ័ពម៉ារីន និងនាវាជើងទឹកធន់ធ្ងន់របស់អាមេរិក កំពុងធ្វើដំណើរទៅកាន់តំបន់មជ្ឈិមបូព៌ាក៏ដោយ៕