អនុរដ្ឋមន្ត្រីការបរទេសគុយបា លោក Carlos Fernandez de Cossio បាននិយាយកាលពីចុងសប្តាហ៍មុនថា ប្រទេសគុយបា បានត្រៀមខ្លួនរួចជាស្រេចសម្រាប់ «លទ្ធភាពដែលទំនងជាមិនកើតឡើង» នៃការប៉ះទង្គិចផ្នែកយោធាជាមួយសហរដ្ឋអាមេរិក ដើម្បីឆ្លើយតបទៅនឹងការគំរាមកំហែងរបស់លោកប្រធានាធិបតីអាមេរិក ដូណាល់ ត្រាំ ក្នុងការចូលកាន់កាប់ប្រទេសកោះតំបន់ការ៉ាអ៊ីពមួយនេះ។

រដ្ឋាភិបាលទីក្រុងឡាហាវ៉ាន និងវ៉ាស៊ីនតោន បានចូលរួមក្នុងកិច្ចពិភាក្សាកាលពីដើមខែមីនានេះ ខណៈការបិទខ្ទប់ប្រេងឥន្ធនៈដែលដាក់ចេញដោយលោក ត្រាំ កំពុងរុញច្រានប្រទេសដែលដឹកនាំតាមបែបបក្សកុម្មុយនីស្តមួយនេះ ឱ្យធ្លាក់ក្នុងវិបត្តិសេដ្ឋកិច្ចកាន់តែធ្ងន់ធ្ងរឡើង។ កាលពីថ្ងៃចន្ទសប្ដាហ៍មុន លោក ត្រាំ បានបង្កើនវោហារសាស្ត្រវាយប្រហារប្រឆាំងនឹងគុយបា ដោយនិយាយថា លោកសង្ឃឹមថានឹងមាន «កិត្តិយស» ក្នុងការដណ្តើមយកគុយបា។

លោក De Cossio បានប្រាប់កម្មវិធីរបស់ទូរទស្សន៍ NBC ដែលបានចាក់ផ្សាយកាលពីថ្ងៃអាទិត្យ (២២ មីនា) ថា៖ «ជាប្រវត្តិសាស្ត្រ គុយបាតែងតែត្រៀមខ្លួនជាស្រេចក្នុងការកៀងគរប្រជាជាតិទាំងមូល ដើម្បីប្រឆាំងនឹងការឈ្លានពានផ្នែកយោធា... គុយបាមិនជឿថារឿងនេះនឹងអាចកើតឡើងទេ ប៉ុន្តែការមិនបានត្រៀមខ្លួនទុកជាមុនគឺជារឿងដ៏ឆោតល្ងង់បំផុត។ យ៉ាងណាក៏ដោយ គុយបាមើលមិនឃើញហេតុផលសមរម្យណាមួយដែលលទ្ធភាពបែបនោះអាចកើតឡើងឡើយ»។

របាយការណ៍នានាបានលើកឡើងថា រដ្ឋបាលលោក ត្រាំ កំពុងតែចង់ទម្លាក់ប្រធានាធិបតីគុយបា លោក Miguel Diaz-Canel ចេញពីអំណាច។ លោក De Cossio បានបញ្ជាក់ថា រាល់ការលើកឡើងដែលថា លក្ខណៈ រចនាសម្ព័ន្ធ ឬសមាជិកនៃរដ្ឋាភិបាលគុយបា អាចយកមកធ្វើជាប្រធានបទនៃកិច្ចចរចាជាមួយសហរដ្ឋអាមេរិក គឺជារឿងមិនពិតនោះទេ។ លោកបន្ថែមថា ការផ្លាស់ប្តូររបបដឹកនាំគឺ «ដាច់ខាត» មិនអាចជាប្រធានបទពិភាក្សាជាមួយសហរដ្ឋអាមេរិកបានឡើយ៕