លោកប្រធានាធិបតី Volodymyr Zelenskyy បាននិយាយបន្ទាប់ពីកិច្ចប្រជុំយោធាមួយកាលពីថ្ងៃទី២២ ខែមីនា ថា កងកម្លាំងរុស្ស៊ី បានបង្កើនការវាយប្រហារយ៉ាងខ្លាំងក្នុងរយៈពេលមួយសប្តាហ៍កន្លងមកនេះ។លោក Zelenskyy ត្រូវបានរាយការណ៍ជូនដោយអគ្គមេបញ្ជាការ លោក Oleksandr Syrskyi និងអគ្គសេនាធិការ លោក Andrii Hnatov ដែលបាននិយាយថា កងទ័ពរុស្ស៊ីបាន ទាញយកអត្ថប្រយោជន៍ពីអាកាសធាតុអំណោយផលជាងមុន ដើម្បីបង្កើនកិច្ចខិតខំប្រឹងប្រែងវាយលុករបស់ពួកគេនៅក្នុងតំបន់ជាច្រើន។

មេដឹកនាំអ៊ុយក្រែនរូបនេះ បាននិយាយថា លទ្ធផលជាក់ស្តែងតែមួយគត់សម្រាប់កងទ័ពរុស្ស៊ីគឺការកើនឡើងនៃការខាតបង់របស់ពួកគេ ជាពិសេស ក្នុងរយៈពេលត្រឹមតែប្រាំពីរថ្ងៃមកនេះ មានទាហានរុស្ស៊ីជាង៨.០០០ នាក់ត្រូវបានសម្លាប់ និងរងរបួសធ្ងន់។

លោកថា កងទ័ពរុស្ស៊ីបានព្យាយាមរុលទៅមុខពីតំបន់ព្រំដែននៃតំបន់ Kharkiv និង Sumy។ កងកម្លាំងអ៊ុយក្រែនកំពុងវាយបណ្ដេញអង្គភាពរុស្ស៊ីដែលចាប់ផ្តើមការប៉ុនប៉ងទាំងនេះ។

លោកបាននិយាយថា ទីតាំងនៅក្នុងតំបន់ Donetsk ដែលកំពុងមានជម្លោះមិនមានការផ្លាស់ប្តូរគួរឱ្យកត់សម្គាល់ក្នុងរយៈពេលមួយសប្តាហ៍កន្លងមកនេះទេ។

ប្រធានាធិបតីអ៊ុយក្រែន រូបនេះ ក៏បាននិយាយថាផងដែរថា លោកមានអារម្មណ៍មិនល្អទាល់តែសោះអំពីផលវិបាកនៃជម្លោះមជ្ឈិមបូព៌ា ដែលប៉ះពាល់ប្រទេសរបស់លោក ពិសេស ដំណើរការចរចាសន្តិភាពសម្របសម្រួលដោយអាមេរិក៕