ជម្លោះរវាងសហរដ្ឋអាមេរិក-អ៊ីស្រាអែល-អ៊ីរ៉ង់បានចូលដល់ថ្ងៃទី ២៤ហើយ ដោយពុំមានសញ្ញាបញ្ចប់ ខណៈអ៊ីរ៉ង់បានប្រឆាំងនឹងការគំរាមកំហែងរបស់សហរដ្ឋអាមេរិក ស្របពេលអ៊ីស្រាអែលបានថ្លឹងថ្លែងពីប្រតិបត្តិការនៅក្នុងប្រទេសអ៊ីរ៉ង់ និងលីបង់ ដែលរំពឹងថានឹងមានរយៈពេលជាច្រើនសប្តាហ៍។

យោងតាមបណ្តាញព័ត៌មានអ៊ីរ៉ង់ Press TV កងកម្លាំងឆ្មាំបដិវត្តន៍អ៊ីស្លាម (IRGC) របស់អ៊ីរ៉ង់បានចាប់ផ្តើមរលកទី៧៥ នៃប្រតិបត្តិការ True Promise 4 ដោយកំណត់គោលដៅទីតាំងយោធាអ៊ីស្រាអែល និងមូលដ្ឋានទ័ពអាកាស Prince Sultan Air Base របស់សហរដ្ឋអាមេរិកនៅតំបន់ Al-Kharj ប្រទេសអារ៉ាប៊ីសាអ៊ូឌីត។

ជម្លោះដែលនៅតែបន្តកំពុងប្រឈមនឹងដំណាក់កាលដ៏សំខាន់មួយ ខណៈប្រធានាធិបតីអាមេរិក  Donald Trump បានគំរាមកាលពីល្ងាចថ្ងៃសៅរ៍ថានឹងវាយប្រហារបណ្តាញអគ្គិសនីរបស់អ៊ីរ៉ង់ក្នុងរយៈពេល៤៨ម៉ោង ប្រសិនបើប្រទេសនេះមិនបើកច្រកសមុទ្រ Hormuz ទាំងស្រុងនោះទេ។

ដោយពន្យល់អំពីជំហររបស់ខ្លួន ក្រសួងការបរទេសអ៊ីរ៉ង់បានចេញសេចក្តីថ្លែងការណ៍មួយកាលពីថ្ងៃអាទិត្យ ដោយអះអាងថាច្រកសមុទ្រ Hormuz មិនត្រូវបានបិទទេ ហើយការធ្វើនាវាចរណ៍នៅតែបន្ត ទោះបីជាវិធានការចាំបាច់ត្រូវបានអនុវត្តដោយសារតែលក្ខខណ្ឌក្នុងពេលមានសង្គ្រាមក៏ដោយ។

ក្រសួងខាងលើបានគូសបញ្ជាក់ថា បន្ទាប់ពី ការឈ្លានពានដោយយោធារបស់សហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ ស្ថានភាពដ៏គ្រោះថ្នាក់មួយត្រូវបានដាក់លើឈូងសមុទ្រ និងច្រកសមុទ្រ Hormuz ដែលប៉ះពាល់ដោយផ្ទាល់ដល់សុវត្ថិភាព និងសន្តិសុខដឹកជញ្ជូនក្នុងតំបន់៕