យោធាអ៊ុយក្រែនបានរាយការណ៍ថា កងទ័ពរុស្ស៊ី បានស្លាប់និងរបួសសរុបជិត ១.០០០នាក់ ក្នុងរយៈពេលត្រឹមតែមួយថ្ងៃប៉ុណ្ណោះ ខណៈទីក្រុងមូស្គូ ហាក់ដូចជាបានចាប់ផ្តើមការវាយលុកក្នុងនិទាឃរដូវដូចការរំពឹងទុក នៅក្នុងតំបន់ Donetsk ភាគខាងកើតរបស់អ៊ុយក្រែន។

នាយនាធិការនៃកងទ័ពអ៊ុយក្រែន បានឱ្យដឹងលើបណ្តាញសង្គមហ្វេសប៊ុកកាលពីថ្ងៃអាទិត្យ (២២ មីនា) ថា ការបាត់បង់កម្លាំងប្រយុទ្ធរបស់រុស្ស៊ីក្នុងរយៈពេល ២៤ម៉ោងកន្លងទៅនោះ រួមមានបុគ្គលិក ៩៤០នាក់ ប្រព័ន្ធការពារអាកាស ៣គ្រឿង និងរថក្រោះ ៣គ្រឿង។ អ៊ុយក្រែនបន្តថា ខ្លួនបានបាញ់ទម្លាក់ឧទ្ធម្ភាគចក្រយោធារុស្ស៊ីមួយគ្រឿងទៀតកាលពីថ្ងៃសៅរ៍កន្លងទៅ ដែលជាការបាត់បង់ឧទ្ធម្ភាគចក្រគ្រឿងទីពីរហើយសម្រាប់ទីក្រុងមូស្គូ ក្នុងរយៈពេលត្រឹមតែពីរថ្ងៃប៉ុណ្ណោះ។

យោងតាមការចុះផ្សាយរបស់សារព័ត៌មាន Kyiv Independent របស់អ៊ុយក្រែន ទិន្នន័យថ្មីនេះបង្ហាញពីស្ថិរភាពនៃការស្លាប់និងរបួសរបស់ទាហានរុស្ស៊ី បន្ទាប់ពីមន្ត្រីអ៊ុយក្រែនបានរាយការណ៍ពីកំណើនយ៉ាងខ្លាំងនៃចំនួនអ្នកបាត់បង់ជីវិត ដោយក្នុងនោះកងកម្លាំងរុស្ស៊ីចន្លោះពី ១.៥០០ ទៅ ១.៧០០នាក់ ត្រូវបានសម្លាប់ក្នុងរយៈពេលប៉ុន្មានថ្ងៃកាលពីសប្តាហ៍មុន ដែលជាតួលេខប្រហែលពីរដងនៃកម្រិតដែលបានឃើញក្នុងអំឡុងប្រតិបត្តិការយោធានៅរដូវរងា។

វិទ្យាស្ថានសម្រាប់ការសិក្សាសង្គ្រាម (ISW) ដែលជាស្ថាប័នស្រាវជ្រាវយោធាមានមូលដ្ឋាននៅសហរដ្ឋអាមេរិក បាននិយាយក្នុងការវាយតម្លៃកាលពីថ្ងៃសៅរ៍ថា ស្ថានការណ៍វិវត្តន៍នៅខ្សែត្រៀមជួរមុខអ៊ុយក្រែននាពេលថ្មីៗនេះ បង្ហាញថា កងកម្លាំងរុស្ស៊ី «ទំនងជាបានចាប់ផ្តើមការវាយលុកនិទាឃរដូវ និងរដូវក្តៅឆ្នាំ២០២៦ របស់ខ្លួន» ប្រឆាំងនឹងខ្សែត្រៀមការពារដ៏សំខាន់របស់អ៊ុយក្រែនក្នុងតំបន់ Donetsk៕