កងទ័ពអ៊ីស្រាអែល (IDF) បាននិយាយកាលពីថ្ងៃអាទិត្យ (២២ មីនា) ថា អ៊ីរ៉ង់បានបាញ់មីស៊ីលបាលីស្ទិកចំនួនជាង ៤០០ គ្រាប់ទៅលើអ៊ីស្រាអែល ចាប់តាំងពីការចាប់ផ្តើមនៃសង្រ្គាមនៅមជ្ឈិមបូព៌ា ដោយក្នុងនោះ មីស៊ីលប្រហែល ៩២ភាគរយ ត្រូវស្ទាក់ចាប់បាន។

តួលេខទាំងនេះត្រូវបានប្រកាស រយៈពេលមួយថ្ងៃប៉ុណ្ណោះបន្ទាប់ពីមីស៊ីលអ៊ីរ៉ង់ បានធ្លាក់ចំទីប្រជុំជនចំនួនពីរកន្លែងនៅភាគខាងត្បូងអ៊ីស្រាអែល ដែលបណ្តាលឱ្យមនុស្សប្រហែល ១៨០នាក់ រងរបួស។ អ្នកនាំពាក្យយោធាអ៊ីស្រាអែល លោក Nadav Shoshani ប្រាប់អ្នកយកព័ត៌មានថា៖ «អ៊ីរ៉ង់បានបាញ់មីស៊ីលបាលីស្ទិកជាង ៤០០ គ្រាប់ ហើយអ៊ីស្រាអែលមានអត្រាជោគជ័យក្នុងការស្ទាក់ចាប់ប្រហែល ៩២ ភាគរយនៃមីស៊ីលទាំងនោះ»។

ទីប្រជុំជនមួយក្នុងចំណោមទីតាំងដែលរងការវាយប្រហារកាលពីថ្ងៃទី២១ ខែមីនា គឺទីប្រជុំជន Dimona ដែលត្រូវបានគេជឿជាក់យ៉ាងទូលំទូលាយថា ជាកន្លែងផ្ទុកអាវុធនុយក្លេអ៊ែរដែលមិនបានប្រកាសជាផ្លូវការរបស់អ៊ីស្រាអែល។ ចំណុចធ្លាក់នៃគ្រាប់មីស៊ីលគឺស្ថិតនៅចម្ងាយត្រឹមតែ ៥គីឡូម៉ែត្រប៉ុណ្ណោះពីទីតាំងនុយក្លេអ៊ែររបស់ទីប្រជុំជននេះ។

លោក Shoshani និយាយថា មីស៊ីលដែលបានបាញ់កាលពីថ្ងៃទី២១ ខែមីនា «មិនខុសពីមីស៊ីលបាលីស្ទិកផ្សេងទៀតឡើយ» ហើយរហូតមកដល់ពេលនេះ មានការធ្លាក់ចំគោលដៅដោយផ្ទាល់តែ ៤លើកប៉ុណ្ណោះក្នុងអំឡុងពេលសង្គ្រាម។ យោធាអ៊ីស្រាអែលនិយាយថា ខ្លួននឹងស៊ើបអង្កេតអំពីការបរាជ័យក្នុងការស្ទាក់ចាប់គ្រាប់មីស៊ីលកាលពីថ្ងៃទី២១ ខែមីនានោះ។

នាយករដ្ឋមន្ត្រីអ៊ីស្រាអែល លោក Benjamin Netanyahu បានទទួលស្គាល់ថា យប់ថ្ងៃទី២១ ខែមីនា គឺជា «ពេលវេលាដ៏លំបាកបំផុត» ហើយបានជំរុញប្រជាជនឱ្យប្រញាប់ទៅកាន់ជម្រកការពារគ្រាប់ រាល់ពេលដែលមានស្នូរស៊ីរ៉ែនផ្តល់សញ្ញាអាសន្ន៕