ប្រភពសន្តិសុខអ៊ីរ៉ាក់ បាននិយាយថា បុគ្គលិកសន្តិសុខ ៦នាក់ បានរងរបួស កាលពីថ្ងៃអាទិត្យ ក្នុងការវាយប្រហារដាច់ដោយឡែកពីគ្នាលើមូលដ្ឋានយោធានៅទីក្រុងបាកដាដ និងខេត្ត Babil ភាគកណ្តាល។

ប្រភពមួយពីក្រសួងមហាផ្ទៃអ៊ីរ៉ាក់ បានប្រាប់សារព័ត៌មានស៊ីនហួ ក្នុងលក្ខខណ្ឌសុំមិនបញ្ចេញឈ្មោះថា សមាជិក ៥នាក់នៃសេវាប្រឆាំងភេរវកម្មអ៊ីរ៉ាក់ បានរងរបួស នាព្រឹកព្រលឹមថ្ងៃអាទិត្យ នៅពេលដែលមូលដ្ឋាន Victoria នៅអាកាសយានដ្ឋានអន្តរជាតិបាកដាដ ត្រូវរងការវាយប្រហារដោយរ៉ូកែត។

ដោយឡែក កងកម្លាំងយោធាអ៊ីរ៉ាក់ បាននិយាយនៅក្នុងសេចក្តីថ្លែងការណ៍មួយថា ការវាយប្រហារតាមអាកាសចំនួន ៤លើក របស់អ៊ីស្រាអែល និងអាមេរិក បានត្រូវចំមណ្ឌលសុខភាពរបស់ខ្លួន នៅក្នុងតំបន់ Jurf al-Nasr នៃខេត្ត Babil នៅម៉ោង ៨:៣០យប់ ម៉ោងក្នុងស្រុក (១៧:៣០ ម៉ោងសកល) ដោយបានបណ្តាលឲ្យសមាជិកម្នាក់នៃអង្គភាពវេជ្ជសាស្ត្រ រងរបួស និងខូចខាតយ៉ាងធ្ងន់ធ្ងរដល់ទីតាំងនោះ។

កាលពីល្ងាចថ្ងៃអាទិត្យ ប្រភពពីក្រសួងមហាផ្ទៃ បាននិយាយថា ការវាយប្រហារដោយដ្រូនជាបន្តបន្ទាប់បានកំណត់គោលដៅមូលដ្ឋាន Victoria។ ទំហំនៃអ្នកស្លាប់ និងរបួសពីការវាយប្រហារជាក់លាក់នេះ នៅមិនទាន់ដឹងនៅឡើយទេ។

ការវាយប្រហារទាំងនេះ បានកើតឡើង ស្របពេលមានភាពតានតឹងក្នុងតំបន់កាន់តែខ្លាំងឡើង បន្ទាប់ពីការវាយប្រហាររួមគ្នារបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ ដែលចាប់ផ្តើមនៅថ្ងៃទី ២៨ ខែកុម្ភៈ ដែលអ៊ីរ៉ង់ និងសម្ព័ន្ធមិត្តក្នុងតំបន់របស់ខ្លួន បានឆ្លើយតបដោយការវាយប្រហារលើផលប្រយោជន៍របស់ អ៊ីស្រាអែល និងសហរដ្ឋអាមេរិក នៅទូទាំងមជ្ឈិមបូព៌ា៕