ប្រធានាធិបតីអាមេរិក លោក Donald Trump បានផ្តល់ពេល ២ថ្ងៃដល់អ៊ីរ៉ង់ ដើម្បីឲ្យបើកច្រកសមុទ្រ Hormuz ឡើងវិញ ឬបើមិនដូច្នោះទេ រោងចក្រថាមពលរបស់ខ្លួន នឹងប្រឈមជាមួយការទម្លាក់គ្រាប់បែក ដោយនេះបានបង្កើនភាពតានតឹងនៅក្នុងសង្គ្រាម ដែលឥឡូវនេះស្ថិតនៅក្នុងសប្តាហ៍ទី៤ ជាមួយនឹងការគ្មានសញ្ញាថមថយឡើយ។

លោក Trump ដែលស្ថិតនៅក្រោមសម្ពាធ ដើម្បីឲ្យថ្វើយ៉ាងណាទាញទម្លាក់តម្លៃប្រេងដែលហក់ឡើងខ្ពស់ បាននិយាយថា អ៊ីរ៉ង់ត្រូវតែ «បើកទាំងស្រុង ដោយគ្មានការគំរាមកំហែង» ចំពោះផ្លូវទឹកដ៏សំខាន់ សម្រាប់លំហូរថាមពល។ លោកបានផ្តល់ពេល ៤៨ម៉ោងដល់សាធារណរដ្ឋឥស្លាម អំឡុងការបង្ហោះ នៅលើបណ្ដាញសង្គម Truth Social នៅម៉ោង ៧:៤៤នាទីយប់ ម៉ោងនៅទីក្រុងញូវយ៉ក សហរដ្ឋអាមេរិក ថ្ងៃទី២១ ខែមីនា ឆ្នាំ២០២៦។ ទូរទស្សន៍រដ្ឋ ដោយដកស្រង់សេចក្តីថ្លែងការណ៍ពីទីបញ្ជាការកងទ័ព បានរាយការណ៍កាលពីថ្ងៃអាទិត្យ (ទី២២ ខែមីនា)ថា អ៊ីរ៉ង់បានតបតវិញថា ប្រសិនបើរោងចក្រថាមពលរបស់ខ្លួនត្រូវបានវាយប្រហារនោះ ខ្លួននឹងបិទច្រកសមុទ្រ Hormuz «ទាំងស្រុង»។ 

ផ្លូវទឹកនេះ ដែលការផ្គត់ផ្គង់ប្រេង និងឧស្ម័នធម្មជាតិរាវ ១ភាគ៥ របស់ពិភពលោក ជាធម្មតាធ្វើដំណើរឆ្លងកាត់ ត្រូវបានបិទយ៉ាងមានប្រសិទ្ធភាព ចាប់តាំងពីសហរដ្ឋអាមេរិក និងអ៊ីស្រាអែល បានចាប់ផ្តើមវាយប្រហារអ៊ីរ៉ង់ កាលពីថ្ងៃទី២៨ ខែកុម្ភៈ។ នាវាមកពីប្រទេសមួយចំនួន បានដោះស្រាយ ដើម្បីអាចឆ្លងកាត់បាន។ វោហាសាស្ត្រនេះ បង្ហាញថា គ្មានភាគីណាមួយ មានឆន្ទៈចុះញ៉មឡើយ ដោយសង្គ្រាមនេះបានបង្កឲ្យមានវិបត្តិផ្គត់ផ្គង់ប្រេង និងឧស្ម័នដែលមិនធ្លាប់មានពីមុនមក។

ការគំរាមកំហែងចុងក្រោយបំផុតនេះ បានកើតឡើងបន្ទាប់ពីការវាយប្រហារយ៉ាងធ្ងន់ធ្ងរមួយសប្តាហ៍លើហេដ្ឋារចនាសម្ព័ន្ធថាមពលដ៏សំខាន់ នៅតំបន់មជ្ឈិមបូព៌ា ដែលធ្វើឲ្យហានិភ័យនៃការមានផលប៉ះពាល់សេដ្ឋកិច្ចសកលរយៈពេលវែងកាន់តែធ្ងន់ធ្ងរ។ សមាជិកគណបក្សសាធារណរដ្ឋមួយចំនួន កំពុងបង្ហាញអារម្មណ៍មិនស្រណុកចិត្ត ពាក់ព័ន្ធនឹងសភាពការន៍តានតឹងកាន់តែធ្ងន់ទៅ។ លោកស្រី Lisa Murkowski សមាជិកព្រឹទ្ធសភាបក្សសាធារណរដ្ឋមកពីរដ្ឋ Alaska បាននិយាយនៅថ្ងៃទី២២ ខែមីនាថា៖ «នៅពេលដែលអ៊ីស្រាអែលបានទម្លាក់គ្រាប់បែក លើគោលដៅមិនមែនយោធា ទម្លាក់គ្រាប់បែកលើគោលដៅថាមពល លោកប្រធានាធិបតីបាននិយាយដោយឥតលាក់លៀមថា តើលោកមិនពេញចិត្តកម្រិតណា»។ 

សហរដ្ឋអាមេរិក និងអ៊ីស្រាអែល ភាគច្រើនបានចៀសវាងកំណត់គោលដៅរោងចក្រថាមពល និងទឹករបស់អ៊ីរ៉ង់។ អ៊ីស្រាអែលបានវាយប្រហារទីតាំងស្តុកប្រេងឥន្ធនៈ នៅទីក្រុងតេអេរ៉ង់ កាលពី ២សប្តាហ៍មុន ជាហេតុការណ៍នាំឲ្យមានការរិះគន់ស្ងាត់ៗពីអាមេរិក ដែលយល់ថា វាគឺជាកំហុសយុទ្ធសាស្ត្រដែលអាចធ្វើឲ្យជនស៊ីវិលអ៊ីរ៉ង់ជំទាស់នឹងការវាយលុកនេះ។ យោងតាមទិន្នន័យដែលចងក្រងដោយសារព័ត៌មាន Bloomberg អ៊ីរ៉ង់មានរោងចក្រថាមពលឧស្ម័នធម្មជាតិប្រហែល ១០០កន្លែង ដំណើរការ៕