អគ្គលេខាធិការអង្គការណាតូ (NATO) លោក Mark Rutte កាលពីថ្ងៃអាទិត្យ (ទី២២ ខែមីនា ឆ្នាំ២០២៦) បានស្នើសុំការ «យោគយល់» ពីលោកប្រធានាធិបតីអាមេរិក Donald Trump ក្នុងពេលមានការខកចិត្តរបស់លោក ជាមួយប្រទេសសម្ព័ន្ធមិត្ត ដែលបង្ហាញការរារែកក្នុងការគាំទ្រ ដើម្បីបើកច្រកសមុទ្រ Hormuz ឡើងវិញ។

ក្នុងកម្មវិធី «Face the Nation» របស់ប្រព័ន្ធផ្សព្វផ្សាយ CBS លោក Rutte បានប្រាប់ពិធីការិនី Margaret Brennan ថា៖ «ខ្ញុំយល់ពីការខកចិត្តរបស់លោកប្រធានាធិបតី ដែលវាត្រូវការពេលវេលាខ្លះ ប៉ុន្តែជាថ្មីម្តងទៀត ខ្ញុំក៏ស្នើសុំការយោគយល់ខ្លះដែរ ពីព្រោះប្រទេសនានា ត្រូវត្រៀមខ្លួន សម្រាប់ករណីនេះ ដោយមិនដឹង និងសម្រាប់ហេតុផលដ៏ល្អ អំពីការវាយប្រហារដំបូង លើអ៊ីរ៉ង់ ប៉ុន្តែឥឡូវនេះ កំពុងរួមគ្នា ដើម្បីធានាថា យើងអាចធានាសុវត្ថិភាពច្រកសមុទ្រ Hormuz បាន»។

មេដឹកនាំអាមេរិក បានជំរុញម្តងហើយម្តងទៀតដល់បណ្ដាប្រទេសសមាជិកអង្គការណាតូឲ្យចាត់វិធានការដើម្បីបើកច្រកសមុទ្រ Hormuz ឡើងវិញ។ អ៊ីរ៉ង់បានរឹតបន្តឹងចរាចរណ៍យ៉ាងខ្លាំង តាមរយៈផ្លូវដែលប្រហែល ១ភាគ៥នៃប្រេងរបស់ពិភពលោកឆ្លងកាត់ទីនេះ។

កាលពីថ្ងៃព្រហស្បតិ៍សប្ដាហ៍កន្លងទៅ មេដឹកនាំនៃប្រទេសបារាំង អាល្លឺម៉ង់ អ៊ីតាលី ជប៉ុន ហូឡង់ និងចក្រភពអង់គ្លេស បានថ្កោលទោសការវាយប្រហារថ្មីៗរបស់អ៊ីរ៉ង់ លើរដ្ឋឈូងសមុទ្រ និងការបិទច្រកសមុទ្រ Hormuz របស់ប្រទេសនេះ។ ប៉ុន្តែការធ្វើនោះ មិនបានបញ្ឈប់លោក Trump មិនឲ្យវាយប្រហារម្តងទៀតទៅលើអង្គការណាតូ ដែលបារាំង អាល្លឺម៉ង់ អ៊ីតាលី ហូឡង់ និងចក្រភពអង់គ្លេស ជាសមាជិកនោះឡើយ។

តែយ៉ាងណាក្ដី លោក Rutte បាននិយាយកាលពីថ្ងៃអាទិត្យថា អង្គការណាតូ នឹង «តែងតែជួបជុំគ្នា» ហើយវាគឺ «សមហេតុផលណាស់ដែលប្រទេសនៅអឺរ៉ុបត្រូវការពេល ២-៣សប្តាហ៍» ដើម្បីជួបប្រជុំគ្នា ពាក់ព័ន្ធនឹងផែនការបើកច្រកសមុទ្រ Hormuz ឡើងវិញ ព្រោះពួកគេមិនត្រូវបានជូនដំណឹង មុនពេលមានការវាយប្រហារដំបូងរបស់សហរដ្ឋអាមេរិក-អ៊ីស្រាអែលលើអ៊ីរ៉ង់ឡើយ៕