ប្រទេសចិន នៅថ្ងៃចន្ទ (ទី២៣ ខែមីនា ឆ្នាំ២០២៦) នេះ បានឲ្យដឹងថា ការវាយប្រហារបន្ថែមទៀត នៅតំបន់មជ្ឈិមបូព៌ា ប្រឈមហានិភ័យបង្កើតឲ្យមាន «ស្ថានភាពមិនអាចគ្រប់គ្រងបាន» នៅក្នុងតំបន់ដែលហែកហួរដោយសង្គ្រាម បន្ទាប់ពីប្រធានាធិបតីអាមេរិក លោក Donald Trump បានគំរាមកំហែង «បំផ្លាញ» រោងចក្រថាមពលរបស់អ៊ីរ៉ង់។

លោក Trump បានផ្តល់ពេលវេលា ៤៨ម៉ោងដល់ទីក្រុងតេអេរ៉ង់ កាលពីថ្ងៃសៅរ៍ចុងសប្ដាហ៍កន្លងមក ដើម្បីឲ្យបញ្ចប់ការបិទខ្ទប់នៅផ្នែករបស់ខ្លួន សម្រាប់ច្រកសមុទ្រ Hormuz ដែលជាផ្លូវទឹកដ៏តូចចង្អៀតចូលទៅក្នុងឈូងសមុទ្រ ជាទីដែលប្រេងប្រហែល ១ភាគ៥ របស់ពិភពលោកឆ្លងកាត់ ឬបើមិនដូច្នោះទេ ត្រូវប្រឈមនឹងការវាយប្រហារលើហេដ្ឋារចនាសម្ព័ន្ធថាមពលដ៏សំខាន់របស់ខ្លួន។

ហើយនៅពេលត្រូវបានសួរ អំពីការគំរាមកំហែងរបស់លោក Trump អ្នកនាំពាក្យក្រសួងការបរទេសចិន លោក Lin Jian បានប្រាប់សន្និសីទសារព័ត៌មានថា៖ «ជម្លោះ និងផលប៉ះពាល់របស់វា ទៅលើច្រកសមុទ្រ Hormuz បានគំរាមកំហែងដល់សន្តិសុខថាមពលសកល ក៏ដូចជាការផ្គត់ផ្គង់ប្រេងរបស់ប្រទេសចិន ហើយការប្រើប្រាស់កម្លាំងនឹងត្រឹមតែនាំទៅរកវដ្តដ៏គ្រោះថ្នាក់មួយប៉ុណ្ណោះ»។

លោក Lin បានសង្កត់ធ្ងន់ថា៖ «ប្រសិនបើសង្គ្រាមពង្រីកបន្ថែមទៀត ហើយស្ថានភាពកាន់តែមានសភាពអាក្រក់ទៅម្តងទៀតនោះ តំបន់ទាំងមូលអាចនឹងត្រូវធ្លាក់ចូលទៅក្នុងស្ថានភាពដែលមិនអាចគ្រប់គ្រងបាន»។

គួរបញ្ជាក់ថា ទីក្រុងប៉េកាំងគឺជាដៃគូរបស់អ៊ីរ៉ង់ ដែលត្រូវបានវាយប្រហារដោយសហរដ្ឋអាមេរិក-អ៊ីស្រាអែល ចាប់តាំងពីខែមុន ប៉ុន្តែក៏បានលើកឡើងផងដែរថា ខ្លួន «មិនយល់ស្រប» ជាមួយនឹងការវាយប្រហាររបស់ទីក្រុងតេអេរ៉ង់ ប្រឆាំងនឹងរដ្ឋឈូងសមុទ្រដែលមានមូលដ្ឋានយោធាអាមេរិក និងបានជំរុញឲ្យមានបទឈប់បាញ់៕