អ្នកនាំពាក្យវិមានក្រឹមឡាំង លោក Dmitry Peskov បាននិយាយនៅថ្ងៃចន្ទ (ទី២៣ ខែមីនា ឆ្នាំ២០២៦) នេះថា ការវាយប្រហាររបស់សហរដ្ឋអាមេរិក និងអ៊ីស្រាអែល នៅជិតរោងចក្រថាមពលនុយក្លេអ៊ែរ Bushehr ក្នុងប្រទេសអ៊ីរ៉ង់ គឺគ្រោះថ្នាក់ខ្លាំងណាស់ ហើយរុស្ស៊ីបានចែករំលែកក្តីបារម្ភរបស់ខ្លួន ជាមួយសហរដ្ឋអាមេរិក។

លោក Peskov បាននិយាយថា ការវាយប្រហារបែបនេះ អាចបង្កឲ្យមានផលវិបាកដែលមិនអាចកែបាន។ លោកបានបញ្ជាក់ថា៖ «យើងជឿថា ការវាយប្រហារលើរោងចក្រថាមពលនុយក្លេអ៊ែរ អាចជាគ្រោះថ្នាក់ខ្លាំង។ ហេតុដូច្នេះ ភាគីរុស្ស៊ី ដែលមានជំហរទទួលខុសត្រូវខ្ពស់លើបញ្ហានេះ បានបង្ហាញនូវក្តីបារម្ភរបស់ខ្លួនម្តងហើយម្តងទៀត»។

អ្នកនាំពាក្យវិមានក្រឹមឡាំងរូបនេះ បានបន្តថា ជម្លោះនៅក្នុងប្រទេសអ៊ីរ៉ង់ «ថ្មីៗចុងក្រោយបំផុត» គួរតែត្រូវបានផ្ដោតទៅលើការដោះស្រាយនយោបាយ និងការទូត។ លោកបានបញ្ជាក់បន្ថែមថា៖ «នេះគឺជារឿងតែមួយគត់ដែលអាចជួយបន្ធូរបន្ថយប្រកបដោយប្រសិទ្ធភាព ចំពោះស្ថានភាពតានតឹងដ៏មហន្តរាយ នៅក្នុងតំបន់នេះ»។

កាលពីថ្ងៃទី១៧ ខែមីនា ក្រុមហ៊ុននុយក្លេអ៊ែររដ្ឋរុស្ស៊ី Rosatom បានឲ្យដឹងថា ការវាយប្រហារមួយ ត្រូវបានធ្វើឡើង «លើតំបន់ដែលនៅជាប់នឹងអគារប្រព័ន្ធវាស់ស្ទង់ ដែលមានទីតាំងនៅក្នុងបរិវេណរោងចក្រថាមពលនុយក្លេអ៊ែរ Bushehr ក្បែរអង្គភាពថាមពលដែលកំពុងប្រតិបត្តិការ»។

រុស្ស៊ីបានថ្កោលទោសការធ្វើវាយប្រហារលើដីតំបន់រោងចក្រនេះ ហើយបានអំពាវនាវឲ្យមានការបន្ធូរបន្ថយភាពតានតឹង ជុំវិញរោងចក្រនេះ៕