ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានបដិសេធការរាយការណ៍ពីការចាប់អារម្មណ៍របស់នាយករដ្ឋមន្ត្រីជប៉ុន លោកស្រី Sanae Takaichi ក្នុងការរៀបចំឲ្យមានជំនួបកំពូលជាមួយលោក គីម ដោយបញ្ជាក់ថា ការពិភាក្សានឹងមិនកើតឡើងដោយសារតែជប៉ុនចង់បាននោះឡើយ។

លោកស្រី គីម យ៉ូជុង (Kim Yo Jong) បាននិយាយថា៖ «ប្រសិនបើនាយករដ្ឋមន្ត្រីជប៉ុន ស្វែងរកការដោះស្រាយបញ្ហាឯកតោភាគីរបស់ខ្លួន ដែលយើងមិនទទួលស្គាល់ ថ្នាក់ដឹកនាំរដ្ឋរបស់យើង នឹងមិនមានបំណងជួប ឬអង្គុយទល់មុខជាមួយលោកស្រីនោះទេ»។

សារព័ត៌មាន Chosun Ilbo បានរាយការណ៍ថា នៅក្នុងកិច្ចប្រជុំកំពូលថ្មីៗរបស់លោកស្រី Takaichi ជាមួយប្រធានាធិបតីអាមេរិក លោក Donald Trump កាលពីសប្តាហ៍មុន លោកស្រីបានសម្តែងឆន្ទៈយ៉ាងមុតមាំ ក្នុងការជួបដោយផ្ទាល់ជាមួយមេដឹកនាំកូរ៉េខាងជើង ដើម្បីដោះស្រាយបញ្ហានានា ដូចជាការចាប់ពង្រត់ជនជាតិជប៉ុនជាដើម។

យ៉ាងណាក្ដី ប្អូនស្រីរបស់លោក គីម បាននិយាយថា ដើម្បីឲ្យមេដឹកនាំនៃប្រទេសទាំង២ ជួបប្រជុំគ្នា ជប៉ុនគួរតែងាកចេញជាមុនសិនពី «ការអនុវត្ត និងទម្លាប់ហួសកាលហួសសម័យ» របស់ខ្លួន។ លោកស្រីបានបន្ថែមថា ប៉ុន្តែជប៉ុនសព្វថ្ងៃនេះបានឆ្ពោះទៅកាន់ដៅផ្ទុយឆ្ងាយពេកហើយ។

លោកស្រីបានសង្កត់ធ្ងន់ថា៖ «ខ្ញុំមិនចង់ឃើញនាយករដ្ឋមន្ត្រីជប៉ុនមកកាន់ទីក្រុងព្យុងយ៉ាងទេ។ តែនេះគ្រាន់តែជាជំហរផ្ទាល់ខ្លួនរបស់ខ្ញុំប៉ុណ្ណោះ»។

សេចក្ដីអាត្ថាធិប្បាយចុងក្រោយបំផុត បង្ហាញថា បើទោះបីជាមានរបាយការណ៍ពីប្រព័ន្ធផ្សព្វផ្សាយ ដែលថា លោក Trump អាចនឹងកំពុងស្វែងរកជួបជាមួយលោក គីម ក៏ដោយ ក៏នៅពេលពាក់ព័ន្ធនឹងប្រទេសជប៉ុន កូរ៉េខាងជើងកំពុងប្រកាន់ខ្ជាប់នូវគោលជំហរប្រឆាំងយ៉ាងខ្លាំងក្លារបស់ខ្លួន ចំពោះការចរចាណាមួយ៕