ប្រជាជនដាណឺម៉ាក កំពុងរូតរះចេញទៅទម្លាក់សន្លឹកឆ្នោតរបស់ខ្លួននៅថ្ងៃអង្គារ ទី២៤ ខែមីនានេះ ដែលការបោះឆ្នោតនេះអាចនឹងផ្តល់អាណត្តិទីបីជូននាយករដ្ឋមន្ត្រី លោកស្រី Mette Frederiksen ដោយសារតែជំហរដ៏រឹងមាំរបស់លោកស្រី ទល់នឹងលោកប្រធានាធិបតីអាមេរិក លោក Donald Trump ពាក់ព័ន្ធនឹងបញ្ហាកោះហ្គ្រីនលែន ទោះបីជាក្តីបារម្ភផ្នែកសេដ្ឋកិច្ចបានប៉ះពាល់ដល់កេរ្តិ៍ឈ្មោះនៃនិន្នាការឆ្វេងនិយមរបស់លោកស្រីក៏ដោយ។

ការបោះឆ្នោតចាប់ផ្តើមនៅម៉ោងក្នុងស្រុក ៨ព្រឹក ហើយការិយាល័យបោះឆ្នោតនឹងបិទនៅម៉ោងក្នុងស្រុក ៨យប់ ដោយលទ្ធផលស្ទង់មតិបឋម នឹងចេញផ្សាយភ្លាមៗបន្ទាប់ពីនោះ។ សរុបមក មានគណបក្សចំនួន១២ កំពុងប្រកួតប្រជែងក្នុងការបោះឆ្នោត។ បន្ថែមពីនេះ អាសនៈចំនួន៤ ដែលត្រូវបានបែងចែកសម្រាប់បេក្ខជនមកពីកោះស្វ័យគ្រប់គ្រង ហ្គ្រីនលែន និងប្រជុំកោះស្វ័យគ្រប់គ្រង ហ្វារ៉ូ (Faroe Islands) អាចនឹងក្លាយជាសំឡេងសម្រេចដ៏សំខាន់។ នៅក្នុងប្រព័ន្ធសភារបស់ដាណឺម៉ាក រដ្ឋាភិបាលមិនចាំបាច់មានសំឡេងភាគច្រើនដាច់ខាតដើម្បីកាន់អំណាចនោះទេ គឺគ្រាន់តែមិនត្រូវឱ្យមានសំឡេងភាគច្រើនប្រឆាំងនឹងខ្លួនតែប៉ុណ្ណោះ។

ការស្ទង់មតិបង្ហាញថា បក្សសង្គមប្រជាធិបតេយ្យ របស់លោកស្រី Frederiksen កំពុងឆ្ពោះទៅរកលទ្ធផលទន់ខ្សោយបំផុតមិនធ្លាប់មាន ចាប់តាំងពីមុនសង្គ្រាមលោកលើកទី២។ ប្រជាជនដាណឺម៉ាក ជាច្រើនបានបន្ទោសលោកស្រីថាប្រឹងប្រែងមិនទាន់គ្រប់គ្រាន់ ដើម្បីការពារគំរូសុខុមាលភាពអឺរ៉ុបខាងជើង ខណៈអ្នកផ្សេងទៀតលើកពីភាពធុញទ្រាន់ចំពោះការដឹកនាំរបស់លោកស្រីអស់ពេលជិត ៧ឆ្នាំ។

លោកស្រី Frederiksen វ័យ ៤៨ឆ្នាំ បានអំពាវនាវឱ្យមានការបោះឆ្នោត មុនកាលកំណត់ក្នុងខែតុលា ដែលអ្នកសង្កេតការណ៍និយាយថា គឺដើម្បីទាញយកប្រយោជន៍ពីកំណើនប្រជាប្រិយភាព ស្របពេលវោហារសាស្ត្ររបស់លោក Trump អំពីការគ្រប់គ្រងកោះហ្គ្រីនលែនបានកើនឡើងខ្លាំងកាលពីខែមករា។ ប៉ុន្តែចាប់តាំងពីពេលនោះមក បញ្ហាកោះហ្គ្រីនលែន បានឈានចូលដល់ផ្លូវការទូតដែលមិនសូវតានតឹង ហើយត្រូវបានគ្របដណ្តប់ដោយកង្វល់ក្នុងស្រុកវិញ។

លោកស្រី Frederiksen បានធ្វើយុទ្ធនាការលើការសន្យាថា ជំនាញដឹកនាំដ៏រឹងមាំ និងដែលឆ្លងកាត់ព្យុះភ្លៀងរបស់ខ្លួន នឹងជួយប្រទេសដែលមានប្រជាជន ៦លាននាក់មួយនេះ ឱ្យឆ្លងកាត់ទំនាក់ទំនងដ៏ស្មុគស្មាញជាមួយទីក្រុងវ៉ាស៊ីនតោន និងការឆ្លើយតបរបស់អឺរ៉ុបចំពោះសង្គ្រាមរបស់រុស្ស៊ីជាមួយអ៊ុយក្រែន៕