ប្រធានាធិបតីអ៊ុយក្រែន លោក Volodymyr Zelenskyy បានលើកឡើងថា ការចរចាត្រូវតែបន្តដើម្បីបញ្ចប់ការវាយប្រហាររបស់រុស្ស៊ី ទោះបីជាសហរដ្ឋអាមេរិក កំពុងផ្តោតលើស្ថានភាពនៅក្នុងប្រទេសអ៊ីរ៉ង់ក៏ដោយ។

លោកបានថ្លែងនៅក្នុងសុន្ទរកថាវីដេអូមួយថា អ៊ុយក្រែន និងសហរដ្ឋអាមេរិក បានបញ្ចប់កិច្ចចរចារយៈពេលពីរថ្ងៃកាលពីចុងសប្តាហ៍លើផែនការសន្តិភាព។

លោក Zelenskyy បាននិយាយថា វាច្បាស់ណាស់ថា ការយកចិត្តទុកដាក់របស់ភាគីអាមេរិកនៅពេលនេះ គឺផ្តោតជាចម្បងលើស្ថានភាពសង្គ្រាមអ៊ីរ៉ង់ និងនៅក្នុងតំបន់នោះ ដោយបន្ថែមថា សង្គ្រាមរបស់រុស្ស៊ីប្រឆាំងនឹងអ៊ុយក្រែន ក៏ត្រូវតែបញ្ចប់ផងដែរ។ លោកក៏បានលើកឡើងផងដែរថា មានសញ្ញាបង្ហាញថា ការផ្លាស់ប្តូរបន្ថែមទៀតអាចកើតមាន នៅក្នុងដំណើរការសន្តិភាព។

លោក Rustem Umerov លេខាក្រុមប្រឹក្សាសន្តិសុខ និងការពារជាតិអ៊ុយក្រែន បានសរសេរនៅលើប្រព័ន្ធផ្សព្វផ្សាយសង្គមថា កិច្ចចរចាចុងក្រោយរវាងសហរដ្ឋអាមេរិក និងអ៊ុយក្រែន បានគ្របដណ្តប់លើការធានាសន្តិសុខសម្រាប់អ៊ុយក្រែន និងបញ្ហាផ្សេងៗទៀត។

កាលពីថ្ងៃចន្ទដើមសប្ដាហ៍នេះដែរ អ្នកនាំពាក្យវិមានក្រឹមឡាំង លោក Dmitry Peskov បានច្រានចោលរបាយការណ៍របស់សារព័ត៌មាន Politico ដែលអះអាងថា រុស្ស៊ីបានផ្តល់ជូនដើម្បីបញ្ឈប់ការចែករំលែកព័ត៌មានចារកម្មសម្ងាត់ជាមួយអ៊ីរ៉ង់ ប្រសិនបើទីក្រុងវ៉ាស៊ីនតោនបញ្ឈប់ការចែករំលែកព័ត៌មានចារកម្មជាមួយអ៊ុយក្រែន ដោយហៅរបាយការណ៍នេះថាមិនពិត។ រុស្ស៊ីបានច្រានចោលរួចមកហើយថាខ្លួនពុំបានចែករំលែកព័ត៌មានចារកម្មជាមួយអ៊ីរ៉ង់ឡើយ៕