ទីផ្សារថាមពលសកលកំពុងប្រឈមនឹងការរំខានដ៏ធ្ងន់ធ្ងរបំផុតមួយក្នុងចំណោមការរំខានជាច្រើនរយៈពេលជាច្រើនទសវត្សរ៍ ដោយទីភ្នាក់ងារថាមពលអន្តរជាតិ (IEA) បានព្រមានថា ជម្លោះរវាងសហរដ្ឋអាមេរិក អ៊ីស្រាអែល និងអ៊ីរ៉ង់ ដែលកំពុងបន្តបានកាត់បន្ថយការផ្គត់ផ្គង់ប្រេងប្រហែល ១១ លានបារ៉ែលក្នុងមួយថ្ងៃពីការផ្គត់ផ្គង់ប្រេងសកល ដែលជាផលប៉ះពាល់ធំជាងវិបត្តិប្រេងនាពេលកន្លងមក។

ភាពតានតឹងចុងក្រោយនៅមជ្ឈិមបូព៌ា ពេលនេះបានរុញឲ្យតម្លៃប្រេងនិងឧស្ម័ន ហក់ឡើងខ្ពស់កប់ពពកកាលពីថ្ងៃចន្ទ។ 

លោក Fatih Birol នាយកប្រតិបត្តិ IEA បានប្រាប់ក្លឹបសារព័ត៌មានជាតិនៅទីក្រុង កង់បេរ៉ា (Canberra) ប្រទេសអូស្ត្រាលី កាលពីថ្ងៃចន្ទដើមសប្ដាហ៍នេះថា ការរំខានបច្ចុប្បន្នលើសពីការខាតបង់ការផ្គត់ផ្គង់រួមគ្នានៃវិបត្តិថាមពលឆ្នាំ ១៩៧៣ និង ១៩៧៩ ទៅទៀត។

កាលពីថ្ងៃទី ១១ មីនា ប្រទេសជាសមាជិក IEA បានយល់ព្រមបញ្ចេញប្រេងចំនួន ៤០០ លានបារ៉ែលពីប្រេងបម្រុងយុទ្ធសាស្ត្រ ប្រហែល ២០% នៃស្តុកសរុប ដើម្បីទប់ស្កាត់ការកើនឡើងនៃតម្លៃប្រេងឆៅសកល។ ខណៈការបញ្ចេញនេះអាចបន្ធូរបន្ថយសម្ពាធទីផ្សារ លោក Birol បានសង្កត់ធ្ងន់ថា វាមិនមែនជាដំណោះស្រាយរយៈពេលវែងនោះទេ។ លោកថា ដំណោះស្រាយសំខាន់បំផុតតែមួយគត់ គឺការបើកច្រកសមុទ្រហ័រមូស(Hormuz)ឡើងវិញ។

ច្រកសមុទ្រហ័រមូស ដែលជាផ្លូវទឹកដឹកជញ្ជូនប្រេងប្រហែល ២០% នៃពិភពលោកឆ្លងកាត់ ថ្មីៗនេះបានក្លាយជាចំណុចក្ដៅ បន្ទាប់ពីប្រធានាធិបតីអាមេរិក Donald Trump បានគំរាមវាយប្រហារលើរោងចក្រថាមពល និងទីតាំងស្តុកថាមពលរបស់អ៊ីរ៉ង់ ប្រសិនបើអ៊ីរ៉ង់មិនបើកច្រកសមុទ្រនេះទេ។ ទន្ទឹមនឹងនោះ អ៊ីរ៉ង់បានប្រឆាំងនឹងការគំរាមកំហែងនេះ ហើយបានសង្កត់ធ្ងន់ថា ច្រកសមុទ្រនេះត្រូវបានបិទសម្រាប់តែអ្នកឈ្លានពានប៉ុណ្ណោះ៕