យោងតាមការចុះផ្សាយរបស់សារព័ត៌មាន Semafor កាលពីថ្ងៃចន្ទ (២៣ មីនា) ដោយដកស្រង់សម្តីមន្ត្រីអាមេរិកបានឱ្យដឹងថា សហរដ្ឋអាមេរិក នឹងបន្តការវាយប្រហាររបស់ខ្លួនលើអ៊ីរ៉ង់ ចំណែកការផ្អាកវាយប្រហារគឺអនុវត្តចំពោះតែការវាយប្រហារលើទីតាំងថាមពលរបស់ទីក្រុងតេអេរ៉ង់ប៉ុណ្ណោះ ក្នុងអំឡុងអ្វីដែលលោកប្រធានាធិបតី Donald Trump បានពិពណ៌នាថា ជាកិច្ចពិភាក្សា «ប្រកបដោយផលិតភាព» ជាមួយមន្ត្រីអ៊ីរ៉ង់។

កាលពីថ្ងៃចន្ទ លោក Trump បានបង្ហោះលើបណ្ដាញសង្គមអំពីពន្យារពេល ៥ថ្ងៃលើផែនការវាយប្រហារបណ្តាញថាមពលរបស់អ៊ីរ៉ង់ បន្ទាប់ពីអាមេរិក និងអ៊ីរ៉ង់ បានធ្វើកិច្ចសន្ទនា «ដ៏ល្អ» អំពី «ដំណោះស្រាយពេញលេញ និងទាំងស្រុងនៃអរិភាពនៅមជ្ឈិមបូព៌ា» ប៉ុន្តែក្រោយមក អ៊ីរ៉ង់បានបដិសេធថា ខ្លួនមិនបានចូលរួមក្នុងការចរចាជាមួយសហរដ្ឋអាមេរិកនោះទេ។

យ៉ាងណាក៏ដោយ មន្ត្រីអាមេរិកម្នាក់បានប្រាប់សារព័ត៌មាន Semafor ថា៖ «ការផ្អាកវាយប្រហាររយៈពេល ៥ថ្ងៃគឺមានតែនៅលើទីតាំងថាមពលរបស់អ៊ីរ៉ង់ប៉ុណ្ណោះ»។ មន្រ្តីរូបនេះបន្តថា «ការផ្អាកនេះមិនអនុវត្តចំពោះទីតាំងយោធា និងកងទ័ពជើងទឹក និងមីស៊ីលបាលីស្ទិក និងមូលដ្ឋានឧស្សាហកម្មការពារជាតិនោះទេ។ ដូច្នេះ គំនិតផ្តួចផ្តើមដំបូងនៃប្រតិបត្តិការ Epic Fury នឹងនៅតែបន្ត»។

អ៊ីរ៉ង់វិញក៏នៅតែបន្តប្រតិបត្តិការយោធារបស់ខ្លួននៅថ្ងៃអង្គារ (២៤ មីនា) នេះ ដោយកងឆ្មាំបដិវត្តន៍អ៊ិស្លាមអ៊ីរ៉ង់ (IRGC) បាននិយាយថា ពួកគេកំពុងបើកការវាយប្រហារថ្មីលើគោលដៅរបស់អាមេរិក ហើយបានពណ៌នាពាក្យសម្ដីរបស់លោក Trump ថាជា «ប្រតិបត្តិការចិត្តសាស្រ្ត» ដែល «ហួសសម័យ» ហើយគ្មានឥទ្ធិពលលើការប្រយុទ្ធរបស់ទីក្រុងតេអេរ៉ង់នោះឡើយ៕