អ្នកការទូតជាន់ខ្ពស់មួយរូបរបស់អ៊ុយក្រែន បានថ្លែងកាលពីថ្ងៃចន្ទ (២៣ មីនា) ថា ទីក្រុងមូស្គូបានបញ្ជូនយានដ្រូនទំនើបៗទៅកាន់អ៊ីរ៉ង់ ហើយហេតុផលនេះ បានធ្វើឱ្យទីតាំងផលិតដ្រូនរបស់រុស្ស៊ី ក្លាយជាគោលដៅយោធាស្របច្បាប់ ខណៈលោកបានជំរុញឱ្យបណ្តាប្រទេសលោកខាងលិចបំពាក់អាវុធដល់អ៊ុយក្រែន ដែលមានសមត្ថភាពអាចវាយប្រហារទីតាំងទាំងនោះបាន។

លោក Andriy Melnyk តំណាងអចិន្ត្រៃយ៍របស់អ៊ុយក្រែនប្រចាំអង្គការសហប្រជាជាតិ បាននិយាយថា ការគាំទ្ររបស់រុស្ស៊ីចំពោះទីក្រុងតេអេរ៉ង់ តាមរយៈការផ្តល់កំណែកែលម្អថ្មីនៃដ្រូន Shahed ដែលមានប្រភពដើមមកពីអ៊ីរ៉ង់ រួមទាំងការគាំទ្រផ្នែកយោធាផ្សេងទៀត មានន័យថា ឥឡូវនេះរុស្ស៊ីគឺជាអ្នកសមគំនិតចម្បងរបស់ទីក្រុងតេអេរ៉ង់ នៅក្នុងសង្គ្រាម។ ទីក្រុងមូស្គូបានប្រើប្រាស់ដ្រូន Shahed ប្រឆាំងនឹងអ៊ុយក្រែន ចាប់តាំងពីការចាប់ផ្តើមនៃសង្រ្គាមទ្រង់ទ្រាយធំកាលពីខែកុម្ភៈ ឆ្នាំ២០២២មក។

លោក Melnyk បន្តថា ការបញ្ជូនដ្រូន Shahed កំណែទំនើបកម្មរបស់រុស្ស៊ី ដោយប្រើប្រាស់អាជ្ញាបណ្ណផ្តល់ដោយទីក្រុងតេអេរ៉ង់ គឺជាការបង្កើនជម្លោះយ៉ាងធ្ងន់ធ្ងរ ដែលនឹងអនុញ្ញាតឱ្យអ៊ីរ៉ង់ អាចវាយប្រហារបណ្តាប្រទេសនៅតំបន់ឈូងសមុទ្រ និងកងកម្លាំងសហរដ្ឋអាមេរិកនៅក្នុងតំបន់ក្នុងរយៈពេលដ៏យូរ បង្កឱ្យមានអស្ថិរភាពក្នុងតំបន់ និងគំរាមកំហែងដល់សេដ្ឋកិច្ចពិភពលោក។

ដោយហេតុនេះ លោកបានសង្កត់ធ្ងន់ថា ទីតាំងផលិតដ្រូនរបស់រុស្ស៊ី គួរតែត្រូវបានចាត់ទុកថាជា «គោលដៅស្របច្បាប់សម្រាប់ការវាយប្រហារដោយយោធា នៅក្នុងយុទ្ធនាការប្រឆាំងនឹងរុស្ស៊ី»៕