ការចុះផ្សាយរបស់សារព័ត៌មាន Politico កាលពីថ្ងៃចន្ទ (២៣ មីនា) ដោយដកស្រង់សម្តីមន្ត្រីរដ្ឋបាលពីររូប បានឱ្យដឹងថា សេតវិមានកំពុងពិចារណាដោយស្ងាត់ៗថា ប្រធានសភាអ៊ីរ៉ង់ លោក Mohammad Bagher Ghalibaf ជាដៃគូដែលអាចទៅរួច និងថែមទាំងអាចជាមេដឹកនាំនាពេលអនាគតផងដែរ ខណៈប្រធានាធិបតីអាមេរិក Donald Trump បង្ហាញសញ្ញានៃការផ្លាស់ប្តូរពីសម្ពាធយោធា ទៅរកការបញ្ចប់ជម្លោះតាមរយៈការចរចាវិញ។

របាយការណ៍បន្តថា លោក Ghalibaf វ័យ ៦៤ឆ្នាំ ដែលធ្លាប់គំរាមសងសឹកយ៉ាងចាស់ដៃលើអាមេរិក និងសម្ព័ន្ធមិត្តអាមេរិកជាច្រើនដងនោះ ត្រូវបានមន្ត្រីសេតវិមានមួយចំនួនមើលឃើញថា ជាដៃគូអាចធ្វើការជាមួយបាន ដែលអាចដឹកនាំអ៊ីរ៉ង់ និងចរចាជាមួយអាមេរិក ក្នុងដំណាក់កាលបន្ទាប់នៃសង្គ្រាម។

ទោះជាយ៉ាងណា សេតវិមានមិនទាន់សម្រេចចិត្តលើបុគ្គលណាម្នាក់នៅឡើយទេ ដោយសង្ឃឹមថានឹងបន្តវាស់ស្ទង់សមត្ថភាពបេក្ខជនជាច្រើនរូប ខណៈទីក្រុងវ៉ាស៊ីនតោន កំពុងស្វែងរកនរណាម្នាក់ដែលមានឆន្ទៈក្នុងការឈានទៅរកកិច្ចព្រមព្រៀង។ ដំណឹងរកដៃគូចរចានេះ បានបង្ហាញពីបំណងរបស់អាមេរិក ក្នុងការស្វែងរកច្រកចេញពីស្ថានភាពដ៏លំបាកនៅអ៊ីរ៉ង់ ដែលបានអង្រួនទីផ្សារពិភពលោក បង្កើនតម្លៃប្រេង និងបង្កក្ដីបារម្ភជាថ្មីអំពីបញ្ហាអតិផរណា។

អ្នកនាំពាក្យសេតវិមាន លោកស្រី Karoline Leavitt បាននិយាយថា៖ «ទាំងនេះគឺជាកិច្ចពិភាក្សាការទូតដ៏រសើប ហើយអាមេរិកនឹងមិនបកស្រាយតាមរយៈប្រព័ន្ធផ្សព្វផ្សាយនោះទេ»។ កាលពីថ្ងៃចន្ទ លោក Trump ក៏បានបង្ហើបពីការទាក់ទងទៅកាន់ឥស្សរជន «ជាន់ខ្ពស់» មួយចំនួននៅអ៊ីរ៉ង់ផងដែរ។ យ៉ាងណាមិញ របាយការណ៍និយាយថា ជំនឿណាមួយដែលថាអាមេរិកអាចជ្រើសរើសមេដឹកនាំបន្ទាប់របស់អ៊ីរ៉ង់ ដូចដែលធ្លាប់បានធ្វើនៅវ៉េណេស៊ុយអេឡានោះ ត្រូវបានមន្រ្តីមួយចំនួនយល់ថា ជារឿងឆាប់រហ័សពេកហើយ ឬអាចជាការគិតបែបក្មេងខ្ចីទៀតផង៕