នៅថ្ងៃអង្គារ (ទី២៤ ខែមីនា ឆ្នាំ២០២៦) នេះ ប្រទេសអ៊ីរ៉ង់ បានតែងតាំងអតីតមេបញ្ជាកងឆ្មាំបដិវត្តន៍ និងជាឥស្សរជនជាន់ខ្ពស់នៅក្នុងក្រុមនយោបាយប្រកាន់តឹង ដើម្បីឲ្យកាន់តំណែងដ៏មានឥទ្ធិពលជាប្រមុខក្រុមប្រឹក្សាសន្តិសុខជាតិជាន់ខ្ពស់ (SNSC) ជំនួសលោក Ali Larijani ដែលត្រូវបានសម្លាប់នៅក្នុងការវាយប្រហាររបស់សហរដ្ឋអាមេរិក-អ៊ីស្រាអែល កាលពីសប្តាហ៍មុន។

អ្នកនាំពាក្យរងរបស់ប្រធានាធិបតីអ៊ីរ៉ង់ បានបង្ហោះនៅលើបណ្ដាញសង្គម X នៅថ្ងៃអង្គារនេះថា លោក Mohammad Baqer Zolqadr ត្រូវបានតែងតាំងជាអ្នកស្នងតំណែងរបស់លោក Larijani ជាលេខាធិការនៃ SNSC។

SNSC ដែលធ្វើជាប្រធានផ្លូវការដោយប្រធានាធិបតីជាប់ឆ្នោត លោក Masoud Pezeshkian សម្របសម្រួលសន្តិសុខ និងគោលនយោបាយការបរទេស ហើយរួមមានទាំងមន្ត្រីយោធា ចារកម្ម និងរដ្ឋាភិបាលធំៗ បន្ថែមពីលើតំណាងរបស់មេដឹកនាំកំពូលដែលមានសិទ្ធិអំណាចនិយាយចុងក្រោយ ជុំវិញបញ្ហាទាំងអស់របស់រដ្ឋ។

លោក Zolqadr គឺជាអតីតមេបញ្ជាការកងឆ្មាំបដិវត្តន៍ ដែលធ្លាប់កាន់តំណែងសន្តិសុខជាន់ខ្ពស់ ដូចជាអនុប្រធានសន្តិសុខ នៅក្រសួងមហាផ្ទៃជាដើម។ លោកបានដឹកនាំទីស្នាក់ការបោះឆ្នោតកណ្តាលនៃក្រុមនយោបាយប្រកាន់តឹង គឺរណសិរ្សប្រជាជននៃកងកម្លាំងបដិវត្តន៍ឥស្លាម។

ចាប់តាំងពីឆ្នាំ២០២២ មក លោកបានបម្រើការជាប្រមុខក្រុមប្រឹក្សាវិនិច្ឆ័យ ជាស្ថាប័នមួយដែលដោះស្រាយភាពមិនស្របគ្នា រវាងសភា និងក្រុមប្រឹក្សាត្រួតពិនិត្យច្បាប់របស់ថ្នាក់ដឹកនាំសាសនាឥស្លាមនិកាយស៊ីអ៊ីត ដែលអាចវេតូច្បាប់ និងត្រួតពិនិត្យការបោះឆ្នោត៕