អ្នកនាំពាក្យសេតវិមាន លោកស្រី Karoline Leavitt នៅថ្ងៃអង្គារ (ទី២៤ ខែមីនា ឆ្នាំ២០២៦) នេះ បានពិពណ៌នា អំពីស្ថានភាពជុំវិញការចរចាដែលអាចកើតមានជាមួយអ៊ីរ៉ង់ នៅក្នុងប្រទេសប៉ាគីស្ថាន ដើម្បីដោះស្រាយជម្លោះថា «មិនប្រាកដប្រជា» នោះទេ។

លោកស្រី Leavitt បាននិងកំពុងឆ្លើយតបទៅនឹងសំណួរមួយពីប្រព័ន្ធផ្សព្វផ្សាយ ABC News ជុំវិញការចរចាដែលអាចកើតមាននៅក្នុងទីក្រុងអ៊ីស្លាម៉ាបាដ ដែលពាក់ព័ន្ធនឹងបេសកជនសហរដ្ឋអាមេរិក លោក Steve Witkoff និងកូនប្រសាររបស់លោកប្រធានាធិបតី Donald Trump គឺលោក Jared Kushner រួមជាមួយអនុប្រធានាធិបតី លោក JD Vance។

អ្នកនាំពាក្យរូបនេះបាននិយាយថា៖ «ទាំងនេះគឺជាការពិភាក្សាការទូតដ៏រសើប ហើយសហរដ្ឋអាមេរិកនឹងមិនចរចាតាមរយៈសារព័ត៌មានទេ។ នេះគឺជាស្ថានភាពមិនប្រាកដប្រជាឡើយ ហើយការរំពឹងទុកអំពីការមានកិច្ចប្រជុំ មិនគួរត្រូវបានចាត់ទុកថា ជាចុងក្រោយឡើយ រហូតដល់ដំណើរការនោះត្រូវបានប្រកាសជាផ្លូវការដោយសេតវិមាន»។

មន្ត្រីប៉ាគីស្ថានម្នាក់ត្រូវបានរាយការណ៍ថា បានប្រាប់ប្រព័ន្ធផ្សព្វផ្សាយ ABC ថា មាន «សំណើជាច្រើន» ស្ថិតក្នុងពិចារណា សម្រាប់ការចរចាដែលអាចកើតមាន រួមទាំងកិច្ចប្រជុំដោយផ្ទាល់ នៅក្នុងទីក្រុងអ៊ីស្លាម៉ាបាដផងដែរ។

មន្ត្រីរូបនេះបានបន្ថែមថា ការទាក់ទង រវាងសហរដ្ឋអាមេរិក និងអ៊ីរ៉ង់ ទំនងជានឹងធ្វើឡើងក្នុងរយៈពេល ៥ថ្ងៃ ដែលស្របតាមការបង្ហោះរបស់ប្រធានាធិបតី លោក Donald Trump នៅលើបណ្ដាញសង្គម Truth Social ប៉ុន្តែបានសង្កត់ធ្ងន់ថា មិនទាន់មានការសម្រេចចុងក្រោយណាមួយត្រូវបានធ្វើឡើងនៅឡើយទេ៕