មន្ទីរបញ្ចកោណ ត្រូវបានរំពឹងថា នឹងបញ្ជូនទាហានរាប់ពាន់នាក់មកពីកងពលធំទ័ពឆត្រយោងលេខ៨២ ដែលជាកងពលសម្រាំងរបស់កងទ័ពសហរដ្ឋអាមេរិក ទៅតំបន់កាន់មជ្ឈិមបូព៌ា នេះបើយោងតាមប្រភពចំនួនពីរដែលដឹងបញ្ហានេះបានប្រាប់ទីភ្នាក់ងារសារព័ត៌មានរយទ័រ កាលពីថ្ងៃអង្គារ (២៤ មីនា) ដែលនេះជាការបន្ថែមពីលើកម្លាំងយោធាដ៏ធំសម្បើមរួចទៅហើយរបស់អាមេរិក បើទោះបីជាលោកប្រធានាធិបតី Donald Trump កំពុងពិភាក្សាលទ្ធភាពនៃកិច្ចព្រមព្រៀងជាមួយអ៊ីរ៉ង់ ដើម្បីបញ្ចប់សង្គ្រាមក៏ដោយ។

សារព័ត៌មានរ៉យទ័រធ្លាប់រាយការណ៍កាលពីថ្ងៃទី១៨ ខែមីនាថា រដ្ឋបាលលោក Trump កំពុងពិចារណាដាក់ពង្រាយកងទ័ពអាមេរិកបន្ថែមរាប់ពាន់នាក់ ក្នុងចំណាត់ការមួយដែលនឹងពង្រីកជម្រើសនានា រួមទាំងការដាក់ពង្រាយកម្លាំងជើងគោកក្នុងទឹកដីអ៊ីរ៉ង់ផងដែរ។ ការបង្កើនកម្លាំងបែបនេះអាចធ្វើឱ្យហានិភ័យនៃជម្លោះកើនឡើងយ៉ាងខ្លាំង ដែលបច្ចុប្បន្នបានចូលដល់សប្តាហ៍ទីបួនរួចទៅហើយ និងបានអង្រួនទីផ្សារសកល។

មន្ត្រីដែលសុំមិនបញ្ចេញឈ្មោះទាំងនោះ មិនបញ្ជាក់ច្បាស់ឡើយថា តើកងទ័ពទាំងនោះនឹងត្រូវទៅកាន់ទីតាំងណានៅក្នុងមជ្ឈិមបូព៌ា ឬពេលណានឹងទៅដល់តំបន់នោះទេ។ កងទ័ពទាំងនោះបច្ចុប្បន្នកំពុងឈរជើងនៅបន្ទាយ Fort Bragg រដ្ឋ North Carolina។ យោធាអាមេរិក បានបង្វែរសំណួរសុំការអត្ថាធិប្បាយទៅកាន់សេតវិមាន ចំណែកសេតវិមាននិយាយថា រាល់ការប្រកាសស្តីពីការដាក់ពង្រាយកងទ័ពនឹងចេញពីមន្ទីរបញ្ចកោណ។

ប្រភពមួយបានប្រាប់រ៉យទ័រថា មិនទាន់មានការសម្រេចចិត្តបញ្ជូនទ័ពជើងគោកចូលទឹកដីអ៊ីរ៉ង់ផ្ទាល់ទេ ប៉ុន្តែយោធានឹងពង្រឹងសមត្ថភាពសម្រាប់លទ្ធភាពនៃប្រតិបត្តិការនាពេលអនាគត នៅក្នុងតំបន់។ ប្រភពមួយនិយាយថា មន្ទីរបញ្ចកោណកំណត់ថា នឹងបញ្ជូនទាហានចន្លោះពី ៣.០០០ ទៅ ៤.០០០ នាក់៕