ប្រទេសអ៊ីរ៉ាក់និយាយថា ខ្លួនមានផែនការកោះហៅបេសកជនអាមេរិក និងអ៊ីរ៉ង់ ដើម្បីថ្កោលទោសការវាយប្រហារដ៏បង្ហូរឈាមជាបន្តបន្ទាប់លើទឹកដីរបស់អ៊ីរ៉ាក់ ខណៈប្រទេសអ៊ីរ៉ាក់ត្រូវបានអូសទាញឲ្យធ្លាក់ចូលទៅក្នុងសង្គ្រាមរបស់អាមេរិក-អ៊ីស្រាអែលលើអ៊ីរ៉ង់ កាន់តែខ្លាំងឡើង។

ការិយាល័យរបស់នាយករដ្ឋមន្ត្រីអ៊ីរ៉ាក់ លោក Mohammed Shia al-Sudani បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា ក្រសួងការបរទេសនឹង «ផ្ញើការជូនដំណឹងតវ៉ាជាផ្លូវការ» ទៅកាន់ភារធារីសហរដ្ឋអាមេរិកប្រចាំប្រទេសអ៊ីរ៉ាក់ និងឯកអគ្គរដ្ឋទូតអ៊ីរ៉ង់ប្រចាំទីក្រុង Baghdad ជុំវិញការវាយប្រហារកាលពីពេលថ្មីៗនេះ។ សេចក្តីថ្លែងការណ៍បាននិយាយថា ការវាយប្រហារទាំងនោះរួមមានការកំណត់គោលដៅលើទីបញ្ជាការកណ្តាលនៃកងកម្លាំងចល័តប្រជានិយម (PMF) របស់កងទ័ពនៅក្នុងខេត្ត Anbar ព្រមទាំងទីបញ្ជាការកណ្តាលឆ្មាំតំបន់ឃឺដ ក្នុងទីក្រុង Erbil ជារដ្ឋធានីនៃតំបន់ពាក់កណ្តាលស្វយ័តឃឺដ របស់ប្រទេសអ៊ីរ៉ាក់។ សេចក្តីថ្លែងការណ៍ ដែលបានចេញផ្សាយបន្ទាប់ពីកិច្ចប្រជុំក្រុមប្រឹក្សាសន្តិសុខជាតិអ៊ីរ៉ាក់ និយាយថា ក្រសួងការបរទេសនឹងដាក់ពាក្យបណ្តឹងជាផ្លូវការទៅកាន់ក្រុមប្រឹក្សាសន្តិសុខអង្គការសហប្រជាជាតិ «ទាក់ទងនឹងសកម្មភាពឈ្លានពាន និងផលវិបាកនានា»។

កាលពីថ្ងៃអង្គារ ការិយាល័យប្រធានាធិបតីអ៊ីរ៉ាក់ បានថ្កោលទោសការវាយប្រហារលើទីបញ្ជាការកណ្តាលរបស់កងកម្លាំង PMF នៅខេត្ត Anbar ដែលបានសម្លាប់មនុស្សយ៉ាងហោចណាស់១៥នាក់ រួមទាំងមេបញ្ជាការប្រតិបត្តិការក្នុងតំបន់ផងដែរ។ កងកម្លាំង PMF ត្រូវបានគេស្គាល់ផងដែរថាជា al-Hashd al-Shaabi គឺជាសាខាមួយរបស់កងទ័ពអ៊ីរ៉ាក់ ដែលរួមមានក្រុមប្រដាប់អាវុធមួយចំនួនមានសម្ព័ន្ធភាពជាមួយអ៊ីរ៉ង់។ ទន្ទឹមនឹងនេះ អាជ្ញាធរនៅក្នុងតំបន់ឃឺដរបស់ប្រទេសអ៊ីរ៉ាក់បានចោទប្រកាន់អ៊ីរ៉ង់ពីបទបើកការវាយប្រហារដោយមីស៊ីលបាលីស្ទីកពីរលើកទៅលើកងកម្លាំងឃឺដ ដោយបានសម្លាប់មនុស្ស៦នាក់ និងរបួស ៣០នាក់ផ្សេងទៀត។