តាមរយៈបទបង្ហាញស្តីពី វឌ្ឍនភាព និងទិសដៅនៃការងារអធិការកិច្ចវិស័យមុខងារសាធារណៈ ឯកឧត្តម សយ រាសី អគ្គាធិការនៃអធិការដ្ឋានក្រសួងមុខងារសាធារណៈ បានបង្ហាញពីផែនការមួយក្នុងចំណោមសកម្មភាពឆ្ពោះទៅមុខផ្សេងទៀត នោះគឺ ការរៀបចំមជ្ឈមណ្ឌលផ្តល់ព័ត៌មាន (Call Center) ពាក់ព័ន្ធនឹងមុខងារសាធារណៈ។ 

ការរៀបចំនេះ ជាផ្នែកមួយនៃការងារអធិការកិច្ច ដែលជាមុខងារស្នូលរបស់ក្រសួងមុខងារសាធារណៈ ដើម្បីទទួលបានព័ត៌មាន និងសារផ្ទាល់ពីមន្ត្រីលើករណីនានា ដែលត្រូវតាមដានដោះស្រាយ ក៏ដូចជាផ្តល់ព័ត៌មានត្រឡប់វិញជូនមន្ត្រី។

បទបង្ហាញដដែលបានបង្ហាះថា កន្លងមកអគ្គាធិការដ្ឋាន នៃក្រសួងមុខងារសាធារណៈ ទទួលបណ្តឹងពាក់ព័ន្ធនឹងកិច្ចការមុខងារសាធារណៈចំនួន២៣ករណី ក្នុងនោះបានដោះស្រាយបញ្ចប់ចំនួន១១ករណី ដោះស្រាយបណ្តឹងតាមរយៈការបង្វែរការដោះស្រាយនិងកំពង់បន្តតាមដានបន្ថែមចំនួន៩ករណី និងកំពុងពិនិត្យ ស្រាវជ្រាវ និងបន្តដោះស្រាយបណ្តឹងចំនួន៣ករណី។

ឯកឧត្តមអគ្គាធិការក៏បានបន្ថែមដែរថា អគ្គាធិការដ្ឋានបានបន្តពង្រឹងប្រព័ន្ធគ្រប់គ្រងវត្តមាននៅតាមអង្គភាពចំណុះក្រសួង ស្ថាប័ន ជារៀងរាល់ខែ និងជួបប្រជុំប្រចាំខែជាមួយថ្នាក់ដឹកនាំទទួលបន្ទុកនាយកដ្ឋានធនធានមនុស្សគ្រប់ក្រសួង ស្ថាប័ន។ តាមរយៈទិន្នន័យដែលទទួលបានពីក្រសួង ស្ថាប័នថ្នាក់ជាតិចំនួន៣០ បង្ហាញឱ្យឃើញថាមន្រ្តីដែលមកបំពេញការងារជាប្រចាំមានចំនួនជាង៩០ភាគរយ។