លោកប្រធានាធិបតីអ៊ុយក្រែន Volodymyr Zelenskyy បាននិយាយកាលពីថ្ងៃពុធ (២៥ មីនា) ថា រុស្ស៊ី បានព្យាយាមគំរាមកំហែងសហរដ្ឋអាមេរិក ដោយបានស្នើថា ទីក្រុងមូស្គូនឹងឈប់ចែករំលែកចារកម្មសម្ងាត់យោធាឱ្យអ៊ីរ៉ង់ ជាថ្នូរនឹងការដែលទីក្រុងវ៉ាស៊ីនតោន កាត់ផ្ដាច់ការផ្ដល់ទិន្នន័យចារកម្មសម្ងាត់ដល់អ៊ុយក្រែនវិញ។

លោក Zelenskyy ដែលបានលើកឡើងកាលពីថ្ងៃចន្ទដើមសប្ដាហ៍នេះថា ភ្នាក់ងារចារកម្មសម្ងាត់យោធារបស់អ៊ុយក្រែន មានភស្តុតាង «ដែលមិនអាចប្រកែកបានឡើយ» ថា រុស្ស៊ីកំពុងបន្តផ្តល់ចារកម្មសម្ងាត់ឱ្យអ៊ីរ៉ង់នោះ បានប្រាប់ទីភ្នាក់ងារសារព័ត៌មានរ៉យទ័រថា លោកបានឃើញទិន្នន័យទាំងនោះហើយ ប៉ុន្តែមិនបានលម្អិតបន្ថែមនោះទេ។

ក្នុងបទសម្ភាសន៍នៅវិមានប្រធានាធិបតីក្នុងទីក្រុងគីវ លោក Zelenskyy បានថ្លែងថា ដ្រូនរបស់អ៊ីរ៉ង់មួយចំនួន ដែលត្រូវបានប្រើប្រាស់ដើម្បីវាយប្រហារលើយុទ្ធោបករណ៍ និងសម្ព័ន្ធមិត្តរបស់សហរដ្ឋអាមេរិក ក្នុងអំឡុងសង្រ្គាមនៅមជ្ឈិមបូព៌ា មានផ្ទុកគ្រឿងបង្គុំរបស់រុស្ស៊ី។ លោក Zelenskyy បានបញ្ជាក់ថា៖ «លោកមានរបាយការណ៍ពីភ្នាក់ងារចារកម្ម របស់អ៊ុយក្រែនដែលបង្ហាញថា រុស្ស៊ីកំពុងធ្វើបែបនេះ ហើយរុស្ស៊ីបាននិយាយថា “ខ្លួននឹងមិនបញ្ជូនចារកម្មសម្ងាត់ឱ្យអ៊ីរ៉ង់ទេ ប្រសិនបើអាមេរិកឈប់បញ្ជូនចារកម្មសម្ងាត់ឱ្យអ៊ុយក្រែន”។ នេះពិតជាការគំរាមកំហែងច្បាស់ណាស់»។

រុស្ស៊ីបានបដិសេធថា ខ្លួនមិនបានជួយជ្រោមជ្រែងដល់អ៊ីរ៉ង់នោះទេ នៅក្នុងជម្លោះរយៈពេលមួយខែរវាងអាមេរិក និងអ៊ីស្រាអែល ទល់នឹងទីក្រុងតេអេរ៉ង់។ ទីក្រុងវ៉ាស៊ីនតោនបាននិយាយកាលពីដើមខែនេះថា ខ្លួនក៏បានទទួលការបដិសេធនេះដោយផ្ទាល់ពីទីក្រុងមូស្គូផងដែរ នៅពេលបញ្ហានេះត្រូវបានលើកយកមកពិភាក្សា៕