ប្រធានាធិបតីអាមេរិក លោក Donald Trump បានទទូចកាលពីថ្ងៃពុធ២៥មីនាសប្ដាហ៍នេះថា អ៊ីរ៉ង់កំពុងចូលរួមក្នុងកិច្ចចរចាសន្តិភាព ដោយបានបង្ហាញថា ការបដិសេធរបស់ទីក្រុងតេអេរ៉ង់ គឺដោយសារតែអ្នកចរចាអ៊ីរ៉ង់ខ្លាចថាពួកគេត្រូវបានសម្លាប់ដោយភាគីរបស់ខ្លួនឯង។

លោក Trump បានប្រាប់ពិធីទទួលទានអាហារពេលល្ងាចសម្រាប់សមាជិកសភាគណបក្សសាធារណរដ្ឋថា ពួកគេកំពុងចរចា ហើយពួកគេចង់ធ្វើកិច្ចព្រមព្រៀងខ្លាំងណាស់។ ប៉ុន្តែពួកគេខ្លាចមិនហាននិយាយចេញមកទេ ព្រោះពួកគេគិតថាពួកគេនឹងត្រូវសម្លាប់ដោយប្រជាជនរបស់ខ្លួនឯង ហើយពួកគេក៏ខ្លាចពួកខ្លួននឹងត្រូវបានអាមេរិកសម្លាប់ចោលដែរ។

ការអត្ថាធិប្បាយរបស់មេដឹកនាំអាមេរិករូបនេះ បានកើតឡើងបន្ទាប់ពីរដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា ពួកគេពុំមានបំណងចរចាទេ។

លោក Trump បានបញ្ជាក់ការអះអាងរបស់លោកម្ដងទៀតថា អ៊ីរ៉ង់កំពុងត្រូវបាន បំផ្លាញក្នុងជម្លោះដែលឥឡូវនេះកំពុងស្ថិតនៅក្នុងសប្តាហ៍ទីបួន ទោះទីក្រុងតេអេរ៉ង់នៅតែបន្តគ្រប់គ្រងទាំងស្រុងលើផ្លូវដឹកជញ្ជូនប្រេងដ៏សំខាន់នៃច្រកសមុទ្រ Hormuz ក៏ដោយ។

ដោយវាយប្រហារគូប្រជែងក្នុងប្រទេសរបស់ខ្លួន លោក Trump ក៏បានអះអាងផងដែរថា ក្រុមអ្នកប្រជាធិបតេយ្យកំពុងព្យាយាម ងាកចេញពីភាពជោគជ័យដ៏អស្ចារ្យទាំងអស់ដែលពួកលោកកំពុងមាននៅក្នុងប្រតិបត្តិការយោធានេះ។

ប្រព័ន្ធផ្សព្វផ្សាយរដ្ឋអ៊ីរ៉ង់ថ្មីៗនេះ បានដកស្រង់សម្តីមន្ត្រីម្នាក់ដែលមិនបញ្ជាក់អត្តសញ្ញាណថា សាធារណរដ្ឋអ៊ីស្លាម បានឆ្លើយតបជាអវិជ្ជមាន ចំពោះផែនការ ១៥ ចំណុចដែលបានរាយការណ៍ពីទីក្រុងវ៉ាស៊ីនតោន ក្នុងបំណងបញ្ជប់សង្គ្រាមដែលបានចាប់ផ្ដើមចាប់តាំងពីថ្ងៃទី២៨កុម្ភៈ២០២៦៕