លោក Naim Qassem អគ្គលេខាធិការរបស់ក្រុមហេសបូឡា បាននិយាយកាលពីថ្ងៃពុធថា ក្រុមនេះនឹងបន្តអ្វីដែលលោកបានពិពណ៌នាថា ជា «ការប្រយុទ្ធការពារ» ប្រឆាំងនឹងអ៊ីស្រាអែល ដោយជំរុញឲ្យមានឯកភាពជាតិ និងបដិសេធការអំពាវនាវឲ្យដកហូតអាវុធ ស្របពេលអរិភាពដែលកំពុងបន្ត។

យោងតាមគេហទំព័រព័ត៌មាន al-Manar លោក Qassem បាននិយាយថា៖«យើងកំពុងប្រយុទ្ធដើម្បីការពារប្រទេសលីបង់ និងប្រជាពលរដ្ឋរបស់ខ្លួន ហើយការទទួលខុសត្រូវក្នុងការប្រឆាំងនឹងការឈ្លានពានគឺជាការទទួលខុសត្រូវជាតិសម្រាប់មនុស្សគ្រប់គ្នា រដ្ឋាភិបាល កងទ័ព ប្រជាជន និងកម្លាំងនយោបាយទាំងអស់»។

នៅក្នុងសេចក្តីថ្លែងការណ៍មួយ លោក Qassem បានព្រមានអំពីអ្វីដែលលោកហៅថា «គម្រោងដ៏គ្រោះថ្នាក់របស់អាមេរិកនិងអ៊ីស្រាអែល «ដែលកំណត់គោលដៅទៅលើប្រទេសលីបង់ និងតំបន់ ដោយបន្ថែមថា ការវាយប្រហាររបស់អ៊ីស្រាអែល បានបន្តអស់រយៈពេលជាងមួយឆ្នាំ ទោះបីជាមានកិច្ចព្រមព្រៀងឈប់បាញ់មួយ បានឈានដល់នៅថ្ងៃទី ២៧ ខែវិច្ឆិកា ឆ្នាំ ២០២៤ ក៏ដោយ។

លោកបាននិយាយថា ក្រុមហេសបូឡាប្រឈមមុខនឹងជម្រើសរវាង «ការចុះចាញ់ និងការលះបង់ដីធ្លី សេចក្តីថ្លៃថ្នូរ និងអធិបតេយ្យភាព» ឬ «ការប្រឈមមុខដាក់គ្នា និងការតស៊ូដែលជៀសមិនរួច» ដោយសង្កត់ធ្ងន់ថា ក្រុមនេះ បានត្រៀមខ្លួនរួចជាស្រេច ហើយនឹងបន្តប្រយុទ្ធ។

លោកក៏បានបដិសេធការចរចាជាមួយអ៊ីស្រាអែល ស្របពេលមានការវាយប្រហារជាបន្តបន្ទាប់ និងបាន    រិះគន់ការអំពាវនាវឲ្យមានការគ្រប់គ្រងផ្តាច់មុខរបស់រដ្ឋលើអាវុធ ដោយនិយាយថា វិធានការបែបនេះ នឹងធ្វើឲ្យប្រទេសលីបង់ចុះខ្សោយ និងបម្រើផលប្រយោជន៍របស់អ៊ីស្រាអែល។

ទន្ទឹមនឹងនេះ ក្រសួងសុខាភិបាលលីបង់បាននិយាយនៅក្នុងរបាយការណ៍ប្រចាំថ្ងៃរបស់ខ្លួនថា ចំនួនអ្នកស្លាប់សរុបពីការវាយប្រហាររបស់អ៊ីស្រាអែលលើប្រទេសលីបង់ ចាប់តាំងពីថ្ងៃទី ០២ ខែមីនា បានកើនឡើងដល់ ១.០៩៤ នាក់ ដោយមានមនុស្ស ៣.១១៩នាក់ រងរបួស៕