ប្រធានាធិបតីអាមេរិក លោក ដូណាល់ ត្រាំ (Donald Trump) បានប្រាប់ក្រុមជំនួយការរបស់លោកថា លោកចង់បញ្ចប់ជម្លោះជាមួយអ៊ីរ៉ង់ នៅក្នុងប៉ុន្មានសប្តាហ៍ខាងមុខនេះ។ នេះបើយោងតាមការចុះផ្សាយរបស់សារព័ត៌មាន The Wall Street Journal។

យោងតាមកាសែតនេះ នៅក្នុងការសន្ទនាឯកជន លោក ត្រាំ បានប្រាប់ «សហការីក្នុងរយៈពេលប៉ុន្មានថ្ងៃថ្មីៗនេះថា លោកចង់ជៀសវាងសង្គ្រាមអូសបន្លាយនៅក្នុងប្រទេសអ៊ីរ៉ង់» ហើយថា «លោកគិតថា ជម្លោះនេះ គឺស្ថិតក្នុងដំណាក់កាលចុងក្រោយរបស់វា ដោយជំរុញឲ្យពួកគេប្រកាន់ខ្ជាប់នូវពេលវេលាកំណត់ពី៤ ទៅ ៦សប្តាហ៍ ដែលលោកបានគូសបញ្ជាក់ជាសាធារណៈ»។ The Wall Street Journal បានកត់សម្គាល់ថា ក្រៅពីនេះ មេដឹកនាំអាមេរិករូបនេះ បានប្រាប់ក្រុមរបស់លោកថា ជម្លោះជាមួយអ៊ីរ៉ង់បង្វែរលោកចេញពីអាទិភាពផ្សេងទៀត ដោយបន្ថែមថា ទីប្រឹក្សាជិតស្និទ្ធបំផុតមួយចំនួនរបស់លោកចង់ឲ្យ លោកផ្តោតលើបញ្ហាបន្ទាន់បំផុត ដែលអ្នកបោះឆ្នោតអាមេរិកមានការព្រួយបារម្ភ ដូចជាការដំឡើងថ្លៃដែលបង្កឡើងដោយជម្លោះនេះជាដើម។

កាសែតនេះ បានកត់សម្គាល់ថា សេតវិមានបានគ្រោងដំណើរទស្សនកិច្ចរបស់លោក ត្រាំ ទៅកាន់ប្រទេសចិន នៅពាក់កណ្តាលខែឧសភា «ដោយមានការរំពឹងទុកថា សង្គ្រាមនេះ នឹងត្រូវបានបញ្ចប់ មុនពេលកិច្ចប្រជុំចាប់ផ្តើម»។

សហរដ្ឋអាមេរិក និងអ៊ីស្រាអែល បានចាប់ផ្តើមប្រតិបត្តិការយោធាប្រឆាំងនឹងអ៊ីរ៉ង់ នៅថ្ងៃទី២៨ ខែកុម្ភៈ ដោយវាយប្រហារទីក្រុងធំៗ រួមទាំងទីក្រុងតេអេរ៉ង់ផងដែរ។ សេតវិមានបានបង្ហាញភាពត្រឹមត្រូវនូវការវាយប្រហារនេះ ដោយលើកឡើងពីការគំរាមកំហែងដោយមីស៊ីល និងនុយក្លេអ៊ែរពីអ៊ីរ៉ង់។ កងឆ្មាំបដិវត្តន៍ឥស្លាម អ៊ីរ៉ង់ បានសងសឹកដោយការវាយប្រហារយ៉ាងទូលំទូលាយទៅលើអ៊ីស្រាអែល និងមូលដ្ឋានយោធារបស់សហរដ្ឋអាមេរិកនៅក្នុងប្រទេសបារ៉ែន ហ្ស៊កដានី កាតា គូវ៉ែត អេមីរ៉ាតអារ៉ាប់រួម និងអារ៉ាប៊ីសាអ៊ូ ឌីត។ លោក Ayatollah Ali Khamenei និងឥស្សរជនសំខាន់ៗរបស់អ៊ីរ៉ង់មួយចំនួនទៀត ត្រូវបានសម្លាប់៕