នៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) នេះ ប្រភពពីប៉ាគីស្ថានដែលដឹងអំពីការពិភាក្សា បានប្រាប់សារព័ត៌មាន Reuters ថា ប្រទេសអ៊ីស្រាអែលបានដករដ្ឋមន្ត្រីការបរទេសអ៊ីរ៉ង់ លោក Abbas Araghchi និងប្រធានសភា លោក Mohammad Baqer Qalibaf ចេញពីបញ្ជីឈ្មោះដែលត្រូវវាយប្រហាររបស់ខ្លួន បន្ទាប់ពីប៉ាគីស្ថានបានស្នើឲ្យទីក្រុងវ៉ាស៊ីនតោនកុំកំណត់គោលដៅលើមន្ត្រីជាន់ខ្ពស់ទាំង២។

ប្រភពនោះបានបញ្ជាក់ថា៖ «អ៊ីស្រាអែលបង្ហាញការសម្របសម្រួលរបស់ពួកគេ ហើយចង់ដកអ្នកទាំង២ ចេញ។ យើងបានប្រាប់សហរដ្ឋអាមេរិកថា ប្រសិនបើមន្ត្រីទាំង ២រូប ក៏ត្រូវបានសម្លាប់ដែរនោះ គ្មានអ្នកណាផ្សេងទៀតដែលត្រូវជជែកជាមួយឡើយ។ ដូច្នេះ សហរដ្ឋអាមេរិកបានស្នើឲ្យអ៊ីស្រាអែលដកឈ្មោះចេញ»។

ការិយាល័យយោធា និងការបរទេសរបស់ប៉ាគីស្ថានមិនបានឆ្លើយតបភ្លាមៗឡើយ ចំពោះសំណើសុំការអត្ថាធិប្បាយ ចំពោះការលើកឡើងនេះ។ សារព័ត៌មាន Wall Street Journal (WSJ) បានរាយការណ៍ដំបូងគេថា មន្ត្រីជាន់ខ្ពស់អ៊ីរ៉ង់ទាំង ២រូប ត្រូវបានដកចេញជាបណ្ដោះអាសន្នពីបញ្ជីឈ្មោះរបស់អ៊ីស្រាអែល សម្រាប់មន្ត្រីដែលត្រូវកំណត់គោលដៅវាយប្រហារ ខណៈពេលដែលពួកគេកំពុងស្វែងរកលទ្ធភាពដែលអាចមានកិច្ចចរចាសន្តិភាព។

ដោយដកស្រង់សម្ដីរបស់មន្ត្រីអាមេរិក សារព័ត៌មាន WSJ បានឲ្យដឹងបន្ថែមថា មន្ត្រីទាំង ២រូប ត្រូវបានដកចេញពីបញ្ជីនេះរយៈពេល ៤ ឬ ៥ថ្ងៃ ប៉ុន្តែមិនបានលើកឡើងពីតួនាទីរបស់ប៉ាគីស្ថានណាមួយ នៅក្នុងដំណើរការនោះឡើយ។ ប្រទេសប៉ាគីស្ថាន អេហ្ស៊ីប និងទួរគី កំពុងដើរតួនាទីជាអ្នកសម្របសម្រួល រវាងទីក្រុងតេអេរ៉ង់ និងវ៉ាស៊ីនតោន ដើម្បីបញ្ចប់សង្គ្រាមអ៊ីរ៉ង់៕