វិមានក្រឹមឡាំង នៅថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) នេះ បានប្រាប់ឲ្យដឹងថា ដំណើរទស្សនកិច្ចរបស់សមាជិកសភារុស្ស៊ីទៅកាន់សហរដ្ឋអាមេរិក គឺជាផ្នែកមួយនៃ «កិច្ចសន្ទនាចាំបាច់ខ្លាំងណាស់»។

អ្នកនាំពាក្យវិមានក្រឹមឡាំង លោក Dmitry Peskov បាននិយាយថា ទីក្រុងមូស្គូសង្ឃឹមថា ជំហានដំបូងបែបនេះ នឹងធ្វើឲ្យប្រសើរឡើងក្នុងទំនាក់ទំនង ដែលជាផលប្រយោជន៍របស់ប្រទេសទាំង២។

ប្រព័ន្ធផ្សព្វផ្សាយរុស្ស៊ី បានរាយការណ៍ថា គណៈប្រតិភូសមាជិកសភារុស្ស៊ី បានទៅដល់សហរដ្ឋអាមេរិកហើយ សម្រាប់កិច្ចប្រជុំជាមួយសមាជិកសភាអាមេរិក ដែលជាដំណើរទស្សនកិច្ចលើកដំបូង ចាប់តាំងពីទំនាក់ទំនង រវាងមហាអំណាចនុយក្លេអ៊ែរធំបំផុតទាំង២ របស់ពិភពលោក បានឈានដល់កម្រិតទាបបំផុត ដោយសារសង្គ្រាមនៅអ៊ុយក្រែន។

បន្ទាប់ពីមានការឈ្លានពានលើអ៊ុយក្រែន ក្នុងឆ្នាំ២០២២ មន្ត្រីរុស្ស៊ី បានបញ្ជាក់ថា ទំនាក់ទំនងជាមួយទីក្រុងវ៉ាស៊ីនតោន គឺអាក្រក់ជាងពេលណាៗទាំងអស់។ តែភាពអាប់អួ បានប្រសើរឡើងវិញបន្តិច ចាប់តាំងពីប្រធានាធិបតី លោក Donald Trump បានវិលត្រឡប់ទៅសេតវិមានវិញ និងបានប្រឹងប្រែងជួយសម្របសម្រួលបញ្ចប់សង្គ្រាម។

បើយោងតាមប្រព័ន្ធផ្សព្វផ្សាយរុស្ស៊ី បានឲ្យដឹងថា ដំណើរទស្សនកិច្ចរបស់សមាជិកសភាទៅកាន់សហរដ្ឋអាមេរិកនេះ ដែលត្រូវបានរាយការណ៍ដំបូងដោយសារព័ត៌មាន Vedomosti របស់រុស្ស៊ី រួមមានសមាជិកសភាលោក Vyacheslav Nikonov ដែលជាចៅប្រុសរបស់លោក Vyacheslav Molotov ដែលជារដ្ឋមន្ត្រីការបរទេសនៅក្រោមការដឹកនាំរបស់លោក Josef Stalin។

សារព័ត៌មាន Izvestia បានដកស្រង់សម្តីស្ថានទូតអាមេរិកប្រចាំទីក្រុងមូស្គូ ដែលបាននិយាយថា សមាជិកសភារុស្ស៊ី នឹងជួបជាមួយសមាជិកសភាអាមេរិក នៅថ្ងៃព្រហស្បតិ៍នេះ ហើយបន្ទាប់មកជួបជាមួយមន្ត្រីអាមេរិក នៅថ្ងៃសុក្រ។ អនុប្រធានទី១ នៃគណៈកម្មាធិការកិច្ចការអន្តរជាតិរដ្ឋសភា Duma លោក Alexei Chepa បានប្រាប់សារព័ត៌មាន Izvestia ថា ដំណើរទស្សនកិច្ចនេះ គឺ «ជាផ្នែកមួយនៃការធ្វើឲ្យទំនាក់ទំនងមានប្រក្រតីភាពឡើងវិញ ជាមួយសហរដ្ឋអាមេរិក»៕