លោក Kirill Dmitriev គឺជាប្រេសិតពិសេសរបស់ប្រធានាធិបតីរុស្ស៊ីលោក Vladimir Putin និយាយនៅថ្ងៃព្រហស្បតិ៍នេះថា រុស្ស៊ីបានជូនដំណឹងដល់សហរដ្ឋអាមេរិកពីការវាយប្រហារយានដ្រូនកាលពីពេលថ្មីៗនេះរបស់អ៊ុយក្រែនលើហេដ្ឋារចនាសម្ព័ន្ធថាមពលរុស្ស៊ី ។

លោក Dmitriev និយាយថា អ៊ុយក្រែនកំពុងព្យាយាមធ្វើឲ្យវិបត្តិថាមពលសកលកាន់តែធ្ងន់ធ្ងរឡើងតាមរយៈការវាយប្រហារបែបនេះ ។

លោកបន្តថា អ្នករាល់គ្នាបានមើលឃើញហើយថា អ៊ុយក្រែនកំពុងព្យាយាមបង្អាក់ និងធ្វើឲ្យវិបត្តិថាមពលកាន់តែអាក្រក់ទៅ ។ ការវាយប្រហាររបស់អ៊ុយក្រែនកំពុងបង្កការលំបាកកាន់តែខ្លាំងដែលអាចនាំឲ្យតម្លៃថាមពលកាន់តែខ្ពស់ជាងនេះ រួមទាំងនៅសហភាពអឺរ៉ុប និងអង់គ្លេសផងដែរ ។

គួរឲ្យដឹងថា យោធាអ៊ុយក្រែន បានប្រកាសថា ពួកគេបានវាយប្រហារលើរោងចក្រប្រេងសំខាន់ៗរបស់រុស្ស៊ី ។ ទីក្រុងគីវ បានចោទប្រកាន់ទីក្រុងមូស្គូថា បានប្រើប្រាស់ការលក់ប្រេង ដើម្បីផ្តល់មូលនិធិដល់ជម្លោះ ។ 

នាយសេនាធិការនៃកងកម្លាំងប្រដាប់អាវុធអ៊ុយក្រែន បាននិយាយនៅក្នុងការសារបង្ហោះបង្ហោះលើបណ្តាញព័ត៌មានសង្គមថា ពួកគេបានវាយប្រហារស្ថានីយប្រេងនៅក្រុង Primorsk ស្ថិតក្នុងសមុទ្របាល់ទិក ។

យោធាអ៊ុយក្រែន ក៏បាននិយាយផងដែរថា ពួកគេបានវាយប្រហាររោងចក្រចម្រាញ់ប្រេងមួយនៅក្នុងសាធារណរដ្ឋ Bashkortostan របស់រុស្ស៊ី ស្ថិតនៅចម្ងាយប្រហែល១.៤០០គ.មពីព្រំដែន ៕