ប្រភពក្នុងស្រុកបានប្រាប់ប្រព័ន្ធផ្សព្វផ្សាយថា ការជជែកដេញដោលក្នុងចំណោមក្រុមអ្នកប្រកាន់ជំហរតឹងរបស់អ៊ីរ៉ង់អំពីថា តើទីក្រុងតេអេរ៉ង់គួរតែផលិតគ្រាប់បែកនុយក្លេអ៊ែរ ដើម្បីឆ្លើយតបទៅនឹងការវាយប្រហារដែលកំពុងរីករាលដាលពីសហរដ្ឋអាមេរិក និងអ៊ីស្រាអែលឬយ៉ាងណានោះ កំពុងតែមានសន្ទុះខ្លាំងឡើង ទូលំទូលាយជាងមុន និងមានការទទូចកាន់តែខ្លាំង។

ប្រភពជាន់ខ្ពស់របស់អ៊ីរ៉ង់ពីររូបបានបញ្ជាក់ថា ខណៈកងឆ្មាំបដិវត្តន៍កំពុងក្តោបក្តាប់អំណាចយ៉ាងខ្លាំង បន្ទាប់ពីការធ្វើឃាតមេដឹកនាំកំពូលជើងចាស់ លោក Ayatollah Ali Khamenei នៅដើមសង្គ្រាមកាលពីថ្ងៃទី២៨ ខែកុម្ភៈមក ទស្សនៈរបស់ក្រុមអ្នកប្រកាន់ជំហរតឹងលើវិធីសាស្ត្រនុយក្លេអ៊ែររបស់អ៊ីរ៉ង់ កំពុងមានឥទ្ធិពលកាន់តែខ្លាំងឡើង។

បណ្តាប្រទេសលោកខាងលិចជឿជាក់ជាយូរមកហើយថា អ៊ីរ៉ង់ចង់បានគ្រាប់បែកនុយក្លេអ៊ែរ ឬយ៉ាងហោចណាស់ក៏អ៊ីរ៉ង់ចង់បានសមត្ថភាពក្នុងការផលិតអាវុធដ៏គ្រោះថ្នាក់បែបនេះឱ្យបានឆាប់ ក៏ប៉ុន្តែអ៊ីរ៉ង់តែងបដិសេធជានិច្ច ដោយលើកឡើងថា លោក Khamenei បានហាមឃាត់អាវុធនុយក្លេអ៊ែរព្រោះអាវុធបែបនោះត្រូវបានហាមឃាត់ក្នុងសាសនាអ៊ិស្លាម ហើយបានយោងទៅលើសមាជិកភាពរបស់ខ្លួនក្នុងសន្ធិសញ្ញាមិនរីកសាយភាយអាវុធនុយក្លេអ៊ែរ (NPT)។

ប្រភពបានលើកឡើងថា មកទល់ពេលនេះ មិនទាន់មានផែនការផ្លាស់ប្តូរគោលនយោបាយនុយក្លេអ៊ែររបស់អ៊ីរ៉ង់នៅឡើយទេ ហើយអ៊ីរ៉ង់ក៏មិនទាន់សម្រេចចិត្តស្វះស្វែងបង្កើតគ្រាប់បែកនោះដែរ ប៉ុន្តែសំឡេងដ៏មានឥទ្ធិពលក្នុងជួររដ្ឋាភិបាល កំពុងតែចោទសួរអំពីគោលនយោបាយដែលមានស្រាប់ និងទាមទារឱ្យផ្លាស់ប្តូរ។ ការវាយប្រហាររបស់អាមេរិក និងអ៊ីស្រាអែលលើអ៊ីរ៉ង់ អាចនឹងធ្វើឱ្យអ្នកយុទ្ធសាស្ត្រអ៊ីរ៉ង់ជឿជាក់កាន់តែខ្លាំងថា ពួកគេទទួលបានផលចំណេញតិចតួចណាស់ពីការបោះបង់ចោលការផលិតគ្រាប់បែក ឬការបន្តស្ថិតក្នុងសន្ធិសញ្ញាមិនរីកសាយភាយអាវុធនុយក្លេអ៊ែរ NPT នោះ៕