ហ្វីលីពីន និងបារាំង បានចុះហត្ថលេខាលើកិច្ចព្រមព្រៀងកងកម្លាំងទស្សនកិច្ច ដែលនឹងអនុញ្ញាតឱ្យភាគីទាំងពីរធ្វើសមយុទ្ធយោធារួមលើទឹកដីនៃប្រទេសទាំងពីរ ខណៈទីក្រុងម៉ានីល កំពុងពង្រីកទំនាក់ទំនងការពារជាតិ ស្របពេលមានភាពតានតឹងកើនឡើងជាមួយទីក្រុងប៉េកាំង នៅក្នុងសមុទ្រចិនខាងត្បូង។

រដ្ឋមន្ត្រីការពារជាតិហ្វីលីពីន លោក Gilberto Teodoro និងរដ្ឋមន្ត្រីក្រសួងកងកម្លាំងប្រដាប់អាវុធ និងអតីតយុទ្ធជនបារាំង លោកស្រី Catherine Vautrin បានចុះកិច្ចព្រមព្រៀងនេះនៅថ្ងៃទី២៦ ខែមីនា ក្នុងអំឡុងជំនួបមួយនៅទីក្រុងប៉ារីស ជាទីដែលមន្រ្តីជាន់ខ្ពស់ទាំងពីរបានពិភាក្សាបញ្ហាប្រឈមសន្តិសុខក្នុងតំបន់ និងបញ្ជាក់ជាថ្មីនូវការគាំទ្រចំពោះសណ្តាប់ធ្នាប់អន្តរជាតិដែលផ្អែកលើច្បាប់។

ក្រៅពីបារាំង ហ្វីលីពីនក៏មានកិច្ចព្រមព្រៀងកងកម្លាំងទស្សនកិច្ចជាមួយសហរដ្ឋអាមេរិក អូស្ត្រាលី ជប៉ុន និងនូវែលសេឡង់ផងដែរ។ ទីក្រុងប៉េកាំង អះអាងសិទ្ធិស្ទើរតែទាំងស្រុងលើសមុទ្រចិនខាងត្បូង ដែលជាផ្លូវទឹកយុទ្ធសាស្ត្រមួយ មានពាណិជ្ជកម្មទំហំជាង ៣សែនកោដិដុល្លារ ឆ្លងកាត់ជារៀងរាល់ឆ្នាំ។

ការចុះកិច្ចព្រមព្រៀងយោធាដ៏សំខាន់របស់ទីក្រុងម៉ានីលជាមួយទីក្រុងប៉ារីសនេះ កើតឡើងត្រឹមតែមួយថ្ងៃប៉ុណ្ណោះបន្ទាប់ពីកងទ័ពហ្វីលីពីន និយាយថា នាវាចម្បាំងបំពាក់មីស៊ីលរបស់ចិន «បានធ្វើសមយុទ្ធមិនមានសុវត្ថិភាព និងខ្វះវិជ្ជាជីវៈ» ទល់នឹងនាវាកងទ័ពជើងទឹកហ្វីលីពីន ដែលកំពុងប្រតិបត្តិការដែនសមុទ្រក្បែរកោះ Thitu ដែលជាប៉ុស្តិ៍យាមដ៏សំខាន់មួយរបស់ទីក្រុងម៉ានីល ក្នុងដែនទឹកជម្លោះនៃសមុទ្រចិនខាងត្បូង៕