ក្រសួងអប់រំចិន នៅថ្ងៃសុក្រ (២៧ មីនា) នេះ បានប្រកាសពីក្របខណ្ឌមួយ ដើម្បីលើកកម្ពស់សុខភាពរាងកាយ និងផ្លូវចិត្តរបស់សិស្សានុសិស្ស ជាមួយនឹងវិធានការជាច្រើនដែលរួមមាន ការហាមឃាត់សាលារៀនមិនឱ្យដាក់កិច្ចការផ្ទះច្រើនហួសហេតុ និងការរំលោភលើពេលវេលាសម្រាករបស់សិស្ស ពោលគឺមិនឱ្យបង្រៀនក្នុងម៉ោងចេញលេងនោះទេ។

សេចក្តីថ្លែងការណ៍ពីក្រសួង លើបណ្តាញសង្គម WeChat ផ្លូវការរបស់ខ្លួន បាននិយាយថា សាលារៀនត្រូវហាមឃាត់មិនឱ្យរៀបចំការប្រឡងញឹកញាប់ពេក និងបង្កើន «បន្ទុកសិក្សាលើសិស្ស» នោះឡើយ។

ការប្រកាសនេះធ្វើឡើង ខណៈដែលអាជ្ញាធរកំពុងព្យាយាមកាត់បន្ថយសម្ពាធសិក្សា និងកែលម្អសុខភាពផ្លូវចិត្តរបស់សិស្ស ដោយងាកចេញពីអាកប្បកិរិយាជាប្រពៃណីរបស់ចិន ដែលតម្រូវឱ្យកុមារខិតខំសិក្សា និងទទួលបានចំណាត់ថ្នាក់ល្អ។ ក្រុមអ្នកជំនាញនិយាយថា លំហាត់កិច្ចការផ្ទះច្រើនហួសហេតុ គឺជារឿងធម្មតាទៅហើយនៅក្នុងសាលារៀនទូទាំងប្រទេសចិន ដែលនាំឱ្យមានការគេងមិនបានគ្រប់គ្រាន់ និងបញ្ហាថប់បារម្ភ និងបាក់ទឹកចិត្តកាន់តែខ្លាំងឡើង។

ខ្លឹមសារមួយចំនួនក្នុងសេចក្តីជូនដំណឹងនោះនិយាយថា សាលាបឋមសិក្សា និងមធ្យមសិក្សា ត្រូវបានហាមឃាត់មិនឱ្យរៀបចំការប្រឡងគ្រប់ប្រភេទសម្រាប់គោលបំណងជ្រើសរើសសិស្ស ហើយសាលារៀនត្រូវបានហាមឃាត់មិនឱ្យផ្តល់រង្វាន់ ឬដាក់ទណ្ឌកម្មដល់គ្រូបង្រៀន ចំពោះការ «ផ្សព្វផ្សាយ» អ្នកដែលមានពិន្ទុខ្ពស់បំផុតក្នុងការប្រឡងចូលមហាវិទ្យាល័យ។ សាលារៀនក៏មិនត្រូវ «រំលោភលើពេលសម្រាករបស់សិស្ស ឬហាមឃាត់សិស្សមិនឱ្យចេញពីថ្នាក់រៀនក្នុងម៉ោងចេញលេង» ដែរ៕