អ៊ីរ៉ង់ បានចេញ «ឱសានវាទ» ដល់ម្ចាស់សណ្ឋាគារនៅប្រទេសបារ៉ែន និងអារ៉ាប់រួម ដោយព្រមានថា ការទទួលបុគ្គលិកយោធាសហរដ្ឋអាមេរិកឲ្យស្នាក់នៅអាចធ្វើឱ្យទ្រព្យសម្បត្តិរបស់ពួកគេក្លាយជាគោលដៅយោធាស្របច្បាប់ នេះបើយោងតាមទីភ្នាក់ងារសារព័ត៌មានពាក់កណ្តាលផ្លូវការ Fars បានរាយការណ៍កាលពីថ្ងៃព្រហស្បតិ៍។

សារព័ត៌មានFars បានរាយការណ៍ថា កងកម្លាំងសហរដ្ឋអាមេរិក បានស្វែងរកទីជម្រកនៅសណ្ឋាគារក្នុងតំបន់ បន្ទាប់ពីការវាយប្រហារដោយមីស៊ីលរបស់អ៊ីរ៉ង់ និងប្រតិបត្តិការរួមគ្នាជាមួយក្រុមសកម្មប្រយុទ្ធសម្ព័ន្ធមិត្ត ដែលបានកំណត់គោលដៅលើហេដ្ឋារចនាសម្ព័ន្ធយោធារបស់សហរដ្ឋអាមេរិកនៅទូទាំងតំបន់មជ្ឈិមបូព៌ា។ ការព្រមាននេះ គ្របដណ្តប់លើទីតាំងណាមួយដែលទទួលបុគ្គលិកយោធាបរទេស ហើយនឹងចូលជាធរមានភ្លាមៗ ប្រសិនបើសកម្មភាពបែបនេះនៅតែបន្ត។

របាយការណ៍ ក៏បានអះអាងផងដែរថា បុគ្គលិកអាមេរិក បានបង្កើតវត្តមាននៅទីតាំងស៊ីវិលនៅទូទាំងតំបន់ រួមទាំងមូលដ្ឋានដឹកជញ្ជូននៅជិតអាកាសយានដ្ឋានចាស់របស់ទីក្រុងបេរូត និងប្រតិបត្តិការនៅវិមានសាធារណរដ្ឋទីក្រុងដាម៉ាស សណ្ឋាគារ Four Seasons និងសណ្ឋាគារ Sheraton។

កាលពីថ្ងៃព្រហស្បតិ៍ រដ្ឋមន្ត្រីការបរទេសអ៊ីរ៉ង់ លោក Seyed Abbas Araghchi បានព្រមានសណ្ឋាគារនានានៅក្នុងប្រទេសឈូងសមុទ្រអារ៉ាប់ កុំឱ្យទទួលយកបុគ្គលិកយោធាអាមេរិក ដោយចោទប្រកាន់ទាហានទាំងនោះថាបានរត់គេចពីមូលដ្ឋានរបស់ពួកគេ និងប្រើប្រាស់ទីតាំងស៊ីវិលជាកន្លែងលាក់ខ្លួន។