ប្រធានាធិបតីរុស្ស៊ី លោក វ្ល៉ាឌីមៀ ពូទីន បានថ្លែងថា ការកើនឡើងនៃជម្លោះនៅមជ្ឈិមបូព៌ា បានធ្វើឲ្យប៉ះពាល់ដល់ឧស្សាហកម្មជាច្រើន ហើយមិនអាចប្រាប់បានទេថា ផលវិបាកអ្វីបន្ថែមទៀត អាចកើតឡើងនោះ។

លោកបានថ្លែងនៅក្នុងសម័យប្រជុំពេញអង្គនៃសហភាពឧស្សាហកម្ម និងសហគ្រិនរុស្ស៊ីថា៖«ជម្លោះប្រដាប់អាវុធនៅមជ្ឈិមបូព៌ា កំពុងប៉ះពាល់ដល់ស្ថានភាពបច្ចុប្បន្នកាន់តែខ្លាំងឡើង និងបង្កឲ្យមានការរំខានយ៉ាងខ្លាំង ដល់ភស្តុភារកម្មអន្តរជាតិ ការផលិត និងខ្សែច្រវ៉ាក់ផ្គត់ផ្គង់»។

មេដឹកនាំរុស្ស៊ីរូបនេះ បានកត់សម្គាល់ថា វិស័យទាំងមូល ជាពិសេសវិស័យដែលទាក់ទងនឹងការទាញយក និងកែច្នៃអ៊ីដ្រូកាបូន លោហធាតុ ការផលិតជី និងទំនិញ និងផលិតផលជាច្រើនទៀត បានទទួលការភ្ញាក់ផ្អើលយ៉ាងខ្លាំង។ លោកប្រធានាធិបតី ពូទីន បាននិយាយថា៖«វានៅតែពិបាកក្នុងការទស្សន៍ទាយផលវិបាកនៃជម្លោះនៅមជ្ឈិមបូព៌ា ដោយមានទំនុកចិត្តណាស់។ ពុំមែនមានតែខ្ញុំទេ សូម្បីតែអ្នកដែលពាក់ព័ន្ធនឹងជម្លោះនេះ ក៏មិនអាចមើលឃើញពីការវិវត្តដែរ»។

លោកបានបន្ថែមថា៖«ប៉ុន្តែសម្រាប់យើង ស្ថានភាពនេះ គឺកាន់តែពិបាកជាងនេះទៅទៀត។ យ៉ាងណាក៏ដោយ យើងត្រូវតែធ្វើប្រតិបត្តិការក្នុងកាលៈទេសៈ ដែលព្រឹត្តិការណ៍ដែលបានរៀបរាប់ខាងលើ កំពុងកើតឡើង»៕