ចាប់តាំងពីការចាប់ផ្តើមដំបូងនូវជម្លោះមជ្ឈិមបូព៌ាមក អ៊ីរ៉ង់បានមានលំហូររូបិយប័ណ្ណឌីជីថលគ្រីបតូយ៉ាងច្រើន។ ហើយអ្នកជំនាញ លើកឡើងថា រូបិយប័ណ្ណឌីជីថលទាំងនោះកំពុងត្រូវបានប្រើប្រាស់ ដើម្បីគេចពីទណ្ឌកម្មដែលត្រូវបានដាក់លើឆ្មាំបដិវត្តន៍អ៊ីរ៉ង់ ក៏ដូចជាត្រូវបានប្រើជាជម្រកសុវត្ថិភាពផ្នែកហិរញ្ញវត្ថុ ដោយជនស៊ីវិលដែលរងផលប៉ះពាល់ដោយអតិផរណាកើនឡើងផងដែរ។

បើយោងតាមក្រុមហ៊ុនវិភាគទិន្នន័យ Chainalysis បានឲ្យដឹងថា អំឡុងការផ្ទេរក្នុងចំនួនដ៏ច្រើនមិនធម្មតាមួយ រូបិយប័ណ្ណឌីជីថលតម្លៃជាង ១០លានដុល្លារអាមេរិក បានធ្វើប្រតិបត្តិការចេញពីវេទិកាប្តូរប្រាក់អ៊ីរ៉ង់ រវាងថ្ងៃទី២៨ ខែកុម្ភៈ ដែលជាថ្ងៃដំបូងនៃការវាយប្រហារតាមអាកាសអ៊ីស្រាអែល-អាមេរិក និងថ្ងៃទី២ ខែមីនា ឆ្នាំ២០២៦។ គិតត្រឹមថ្ងៃទី៥ ខែមីនា ជិត ១ភាគ៣ នៃមូលនិធិទាំងនេះ ត្រូវបានផ្ទេរទៅវេទិកាប្តូរប្រាក់បរទេស។

អ្នកវិភាគ លោកស្រី Kaitlin Martin មកពីក្រុម Chainalysis បានប្រាប់សារព័ត៌មាន AFP ថា បើទោះបីជា ការផ្ទេរចេញមួយចំនួនធំនេះ អាចត្រូវបានពន្យល់ដោយពលរដ្ឋដែលប្រញាប់ប្រញាល់ ដើម្បីការពារប្រាក់សន្សំរបស់ពួកគេក៏ដោយ ក៏ទំហំដ៏ច្រើននៃទឹកប្រាក់ដែលពាក់ព័ន្ធ បង្ហាញពីការចូលរួមរបស់ «តួអង្គរបប»។ បើយោងតាមអ្នកជំនាញនានា បានបញ្ជាក់ថា សកម្មភាពបែបនេះ ទំនងជាកើតឡើងដោយសារក្ដីបារម្ភពីការមានទណ្ឌកម្មបន្ថែមទៀត ឬការវាយប្រហារតាមប្រព័ន្ធអ៊ីនធឺណិត។

យោងតាមក្រុមហ៊ុន Chainalysis បានឲ្យដឹងថា កាបូបឌីជីថល (ឧបករណ៍ឌីជីថលរក្សាទុកប្រាក់គ្រីបតូ) ជាច្រើនដែលត្រូវបានប្រើប្រាស់ ក្នុងអំឡុងពេលមានការកើនឡើងនូវសកម្មភាពរូបិយប័ណ្ណឌីជីថលនេះត្រូវបានផ្សារភ្ជាប់ដោយផ្ទាល់ទៅនឹងកងឆ្មាំបដិវត្តន៍។

សម្រាប់ប្រទេសអ៊ីរ៉ង់ ដែលភាគច្រើនត្រូវបានកាត់ផ្តាច់ចេញពីប្រព័ន្ធហិរញ្ញវត្ថុប្រពៃណីដោយទណ្ឌកម្មអន្តរជាតិ រូបិយប័ណ្ណគ្រីបតូ គឺជាបណ្តាញជំនួសមួយ ដែលអនុញ្ញាតឲ្យរបបនេះលក់ប្រេងដែលត្រូវបានហាមឃាត់ ឬផ្តល់ហិរញ្ញប្បទានដោយសម្ងាត់ដល់ក្រុមប្រដាប់អាវុធសម្ព័ន្ធមិត្ត ដូចជាក្រុមឧទ្ទាមហ៊ួទី នៅប្រទេសយេម៉ែនជាដើម។ នេះបើយោងតាមការឲ្យដឹងពីអាជ្ញាធរអាមេរិក៕