ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (ទី២៦ ខែមីនា ឆ្នាំ២០២៦) បាននិយាយថា លោកនឹងចាត់វិធានការដោយក្រឹត្យ ដើម្បីឲ្យបើកប្រាក់ឈ្នួលដល់បុគ្គលិកសន្តិសុខអាកាសយានដ្ឋានចំនួន ៥០.០០០នាក់ ខណៈដែលកិច្ចព្រមព្រៀង ត្រូវបានជាប់គាំងនៅក្នុងសភា ជាការសម្រេចដើម្បីដោះស្រាយកង្វះខាតបុគ្គលិក ដែលបានរំខានដល់ការធ្វើដំណើរ ជុំវិញប្រទេស។

លោក Trump បានបញ្ជាក់ថា លោកកំពុងណែនាំក្រសួងសន្តិសុខមាតុភូមិ (HSD) «ឲ្យបើកប្រាក់ឈ្នួលដល់ភ្នាក់ងារ TSA (រដ្ឋបាលសន្តិសុខដឹកជញ្ជូន) របស់យើងជាបន្ទាន់ ដើម្បីដោះស្រាយស្ថានភាពអាសន្ននេះ និងដើម្បីបញ្ឈប់ភាពវឹកវរ នៅអាកាសយានដ្ឋានយ៉ាងឆាប់រហ័ស ដែលត្រូវបានចោទថា ដោយសារគណបក្សប្រជាធិបតេយ្យ។ លោកបានសង្កត់ធ្ងន់ថា វាមិនមែនជារឿងងាយស្រួលនោះទេ ប៉ុន្តែលោកនឹងធ្វើវា។

ក្រសួងសន្តិសុខមាតុភូមិបានឲ្យដឹងថា មន្ត្រីសន្តិសុខអាកាសយានដ្ឋានជិត ៥០០នាក់ បានលាលែងពីតំណែង ចាប់តាំងពីការចាប់ផ្តើមបិទរដ្ឋាភិបាលដោយផ្នែក កាលពីខែកុម្ភៈ ខណៈដែលភាពមិនត្រូវរ៉ូវគ្នានៅសភា ស្ដីពីការផ្តល់មូលនិធិដល់ក្រសួងនេះ បានបង្ខំឲ្យមន្ត្រីរដ្ឋបាលសន្តិសុខដឹកជញ្ជូនធ្វើការដោយគ្មានប្រាក់ឈ្នួល។

យ៉ាងណាក្ដី គេមិនច្បាស់នោះទេថា តើការផ្តល់មូលនិធិនេះ នឹងមានរយៈពេលយូរប៉ុនណា ឬថា តើលោក Trump កំពុងប្រើប្រាស់មូលនិធិ សម្រាប់ក្រសួងសន្តិសុខមាតុភូមិ ដែលត្រូវបានអនុម័តក្នុងឆ្នាំ២០២៥ ជាផ្នែកមួយនៃសេចក្ដីស្នើច្បាប់ពន្ធ និងការចំណាយដ៏ធំដែរ ឬយ៉ាងណា៕