រដ្ឋមន្រ្តីការបរទេសអង់គ្លេសលោកស្រី Yvette Cooper និយាយនៅថ្ងៃសុក្រនេះថា ប្រទេសរបស់លោកស្រី និងសម្ព័ន្ធមិត្តក្រុមប្រទេសមានឧស្សាហកម្មរីកលូតលាស់ G7 មានទំនាក់ទំនងកើនឡើងរវាងរុស្ស៊ី និងអ៊ីរ៉ង់ ក្រោយប្រទេសមហាអំណាចអឺរ៉ុបចោទប្រកាន់ទីក្រុងមូស្គូថា បានជួយទីក្រុងតេអេរ៉ង់ ក្នុងការវាយប្រហារកងកម្លាំងសហរដ្ឋអាមេរិក នៅក្នុងសង្រ្គាមមជ្ឈិមបូព៌ា ។

មុនជំនួប G7 ដែលនឹងធ្វើឡើងនៅប្រទេសបារាំង លោកស្រី Cooper និយាយថា ពួកយើងមានការព្រួយបារម្ភយ៉ាងខ្លាំងចំពោះទំនាក់ទំនងរវាងរុស្ស៊ី និងអ៊ីរ៉ង់ ដែលមានអាយុកាលចែករំលែងសមត្ថភាពរួមជាយូរមកហើយ ។

កាលពីថ្ងៃព្រហស្បតិ៍ម្សិលមិញ ប្រទេសមហាអំណាចអឺរ៉ុប បានចោទប្រកាន់រុស្ស៊ីថា បានជួយអ៊ីរ៉ង់វាយប្រហារកងកម្លាំងអាមេរិក នៅក្នុងសង្រ្គាមមជ្ឈិមបូព៌ា ហើយពួកគេនិយាយថា ពួកគេនឹងលើកបញ្ហានេះជាមួយរដ្ឋមន្រ្តីការបរទេសសហរដ្ឋអាមេរិកលោក Marco Rubio នៅជំនួបរដ្ឋមន្រ្តីការបរទេសក្រុមប្រទេស G7 នៅបារាំង ។

លោក Rubio នឹងចូលរួមថ្ងៃទី ២នៃជំនួបរដ្ឋមន្រ្តីក្រុមប្រទេសប្រជាធិបតេយ្យឈានមុខគេរបស់អឺរ៉ុប ដែលនឹងធ្វើឡើង ស្របពេលកើតមានសង្រ្គាមនៅអ៊ីរ៉ង់ និងនៅអ៊ុយក្រែន ភាពមិនច្បាស់លាស់សេដ្ឋកិច្ច ហើយនិងការកើនឡើងភាពចលាចលជុំវិញគោលនយោបាយការបរទេសមិនអាចគិតទុកមុនបានរបស់សហរដ្ឋអាមេរិកក្រោមការដឹកនាំរបស់លោក Donald Trump ។

ប្រភពសន្តិសុខលោកខាងលិចចំនួន ២ និងមន្រ្តីក្នុងតំបន់មួយរូបដែលនៅជិតនឹងទីក្រុងតេអេរ៉ង់ និយាយប្រាប់ទីផ្នាក់ងារព័ត៌មានរ៉យទ័រថា រុស្ស៊ីបានផ្តល់រូបភាពផ្កាយរណបដល់អ៊ីរ៉ង់ និងជួយអ៊ីរ៉ង់បង្កើនសមត្ថភាពយានដ្រូនរបស់ខ្លួន ដូចសមត្ថភាពយានដ្រូនរុស្ស៊ី ប្រើប្រាស់វាយប្រហារអ៊ុយក្រែន ។

សារព័ត៌មានផ្សេងទៀត បានរាយការណ៍ផងដែរថា រុស្ស៊ីកំពុងជួយអ៊ីរ៉ង់ ក្នុងជម្លោះជាមួយសហរដ្ឋអាមេរិក និងអ៊ីស្រាអែល ដូចដែលទីក្រុងតេអេរ៉ង់បានជួយទីក្រុងម៉ូស្គូ ក្នុងសង្រ្គាមរបស់ពួកគេជាមួយអ៊ុយក្រែន ៕