នាយករដ្ឋមន្ត្រីដាណឺម៉ាក លោកស្រី Mette Frederiksen និងគណបក្សសង្គមប្រជាធិបតេយ្យ (Social Democrats) របស់លោកស្រី នៅថ្ងៃសុក្រ (ទី២៧ ខែមីនា ឆ្នាំ២០២៦) នេះ បានចាប់ផ្តើមដំណើរការចរចា ដើម្បីបង្កើតរដ្ឋាភិបាលចម្រុះ ដោយសង្ឃឹមថា នឹងធានាបានតំណែងអាណត្តិទី៣ ទោះបីជាមានការបរាជ័យយ៉ាងធំធេង សម្រាប់គណៈរដ្ឋមន្ត្រីកណ្តាលនិយមរបស់លោកស្រី នៅក្នុងការបោះឆ្នោតកាលពីថ្ងៃទី២៤ ខែមីនាក៏ដោយ។

លោកស្រីបានថ្វាយលិខិតលាលែងពីតំណែងទៅព្រះមហាក្សត្រនៃប្រទេសដាណឺម៉ាក កាលពីថ្ងៃទី២៥ ខែមីនា នៅពេលដែលវាគឺច្បាស់លាស់ណាស់ថា រដ្ឋាភិបាលចម្រុះរបស់លោកស្រី ដែលមានគណបក្សកណ្តាលនិយម Moderates និងគណបក្សស្តាំនិយម Liberals លែងអាចឈ្នះបានសំឡេងភាគច្រើនទៀតហើយ។

អ្នកវិភាគបានលើកឡើងថា ការបោះឆ្នោតនេះបង្ហាញពីការមិនពេញចិត្ត លើការចំណាយនៃការរស់នៅ ហើយប្រជាជនដាណឺម៉ាកជាច្រើន បានចាប់ផ្ដើមអស់ចិត្តពីលោកស្រី Frederiksen ហើយ បន្ទាប់ពីបានកាន់អំណាចរយៈពេល ៧ឆ្នាំ ទោះបីជាពួកគេបានសរសើរលោកស្រីថា បានតស៊ូប្រឆាំងនឹងប្រធានាធិបតីអាមេរិក លោក Donald Trump ចំពោះការគំរាមកំហែងរបស់លោក ក្នុងការបញ្ចូលកោះហ្គ្រីនឡែនជាដែនដីឧបសម្ព័ន្ធក៏ដោយ។

លោក Andreas Thyrring អ្នកជំនាញនៅ Ulveman & Borsting ដែលជាក្រុមហ៊ុនប្រឹក្សាយោបល់កិច្ចការសាធារណៈ បាននិយាយថា តម្រូវការក្នុងការបង្កើតការឯកភាពគ្នា រវាងក្រុមតូចៗជាច្រើន នៅក្នុងសភា ដែលមានគណបក្សចំនួន ១២ នេះ នឹងធ្វើឲ្យការចរចាកាន់តែស្មុគស្មាញ។

លោកស្រី Frederiksen មានគណបក្សសង្គមសេរីនិយម (Social Liberals) និងគណបក្ស Green Left គាំទ្រលោកស្រីរួចហើយ ដែលទាំង២ ជាក្រុមឆ្វេងនិយម។ គណបក្សទាំង២ បញ្ជាក់ថា លោកស្រីគួរតែក្លាយជានាយករដ្ឋមន្ត្រី ប៉ុន្តែគណបក្សសង្គមប្រជាធិបតេយ្យ ក៏ត្រូវតែបញ្ចុះបញ្ចូលក្រុមផ្សេងទៀតឲ្យគាំទ្រពួកគេផងដែរ ប្រសិនបើពួកគេចង់រក្សាអំណាច៕