ប្រធានាធិបតីអ៊ុយក្រែន លោក វ៉្លូឌីមី ហ្សេឡិនស្គី បាននិយាយកាលពីថ្ងៃសុក្រថា អារ៉ាប៊ីសាអ៊ូឌីត និងអ៊ុយក្រែន បានឈានដល់កិច្ចព្រមព្រៀងមួយ ដើម្បីបង្កើនកិច្ចសហប្រតិបត្តិការការពារជាតិ។

ប្រធានាធិបតីអ៊ុយក្រែន ដែលកំពុងបំពេញទស្សនកិច្ច បាននិយាយនៅលើបណ្តាញសង្គមថា ឯកសារមួយត្រូវបានចុះហត្ថលេខា រវាងក្រសួងការពារជាតិអ៊ុយក្រែន និងក្រសួងការពារជាតិអារ៉ាប៊ីសាអ៊ូឌីត ដោយរៀបចំការងារមូលដ្ឋានសម្រាប់កិច្ចសន្យានាពេលអនាគត ក៏ដូចជាកិច្ចសហប្រតិបត្តិការបច្ចេកទេស និងវិនិយោគ រវាងភាគីទាំងពីរ។

លោកបានកត់សម្គាល់ថា អ៊ុយក្រែនបានត្រៀមខ្លួនរួចជាស្រេច ដើម្បីចែករំលែកជំនាញ និងប្រព័ន្ធការពារជាតិរបស់ខ្លួន ជាពិសេសក្នុងការទប់ទល់នឹងយានដ្រូន និងមីស៊ីល ដោយសង្កត់ធ្ងន់ថា កិច្ចសហប្រតិបត្តិការជាមួយព្រះរាជាណាចក្រនេះ អាចផ្តល់ផលប្រយោជន៍ទៅវិញទៅមក។

លោកបានបន្ថែមថា ក្រុមអ្នកជំនាញយោធាអ៊ុយក្រែន មានវត្តមាននៅក្នុងព្រះរាជាណាចក្រនេះ ក្នុងរយៈពេលប៉ុន្មានថ្ងៃថ្មីៗនេះ ដោយផ្តល់ការវាយតម្លៃដំបូង លើវិធីនានា ដើម្បីបង្កើនសមត្ថភាពការពារដែនអាកាស៕