រដ្ឋមន្ត្រីការបរទេសអេហ្ស៊ីប លោក Badr Abdelatty និងអគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) បានពិភាក្សាអំពីកិច្ចខិតខំប្រឹងប្រែងរបស់អេហ្ស៊ីប ក្នុងការកាត់បន្ថយភាពតានតឹងក្នុងតំបន់ ក្នុងអំឡុងពេលនៃការសន្ទនាតាមទូរស័ព្ទកាលពីថ្ងៃសុក្រ។ នេះបើយោងតាមសេចក្តីថ្លែងការណ៍របស់ក្រសួងការបរទេសអេហ្ស៊ីប។

លោក ហ្គុយតឺរេស បានសម្តែងការកោតសរសើរចំពោះកិច្ចខិតខំប្រឹងប្រែងសម្របសម្រួលរបស់អេហ្ស៊ីប ដែលបានអនុវត្តក្នុងកិច្ចសហប្រតិបត្តិការជាមួយប្រទេសទួរគី និងប៉ាគីស្ថាន ដើម្បីគាំទ្រដល់ការចរចាដោយផ្ទាល់រវាងសហរដ្ឋអាមេរិក និងអ៊ីរ៉ង់ ដោយបញ្ជាក់ពីការគាំទ្ររបស់UN ចំពោះកិច្ចខិតខំប្រឹងប្រែងទាំងនេះ ដែលមានគោលបំណងកាត់បន្ថយភាពតានតឹងក្នុងតំបន់។

លោកក៏បានសរសើរការប្តេជ្ញាចិត្តរបស់ទីក្រុងគែរចំពោះធម្មនុញ្ញអង្គការសហប្រជាជាតិ និងតួនាទីរបស់ខ្លួន ក្នុងការលើកកម្ពស់សន្តិភាព និងសន្តិសុខអន្តរជាតិ។

យោងតាមសេចក្តីថ្លែងការណ៍ ភាគីទាំងពីរបានផ្លាស់ប្តូរទស្សនៈអំពីការកើនឡើងនៃភាពតានតឹងផ្នែកយោធា នៅក្នុងតំបន់ និងផលប៉ះពាល់របស់វាទៅលើសេរីភាពនៃការធ្វើនាវាចរណ៍ និងខ្សែច្រវ៉ាក់ផ្គត់ផ្គង់ដែលមានសារៈសំខាន់ចំពោះសន្តិសុខស្បៀង និងថាមពល៕