ខណៈជម្លោះអាមេរិក-អ៊ីស្រាអែលជាមួយអ៊ីរ៉ង់បានឈានដល់អាយុកាលជាងមួយខែ ការផ្ទុះឡើងនៃជម្លោះដ៏ធំបំផុតនៅមជ្ឈិមបូព៌ាមិនធ្លាប់មានក្នុងរយៈពេលជាច្រើនទសវត្សរ៍ បានបង្កឱ្យមានការបំផ្លិចបំផ្លាញយ៉ាងទូលំទូលាយនៅទូទាំងតំបន់ និងរលកនៃការប៉ះពាល់ធ្ងន់ធ្ងរនៅជុំវិញពិភពលោក។

ទោះបីជាមានរបាយការណ៍ពីលទ្ធភាពនៃការចរចារវាងទីក្រុងវ៉ាស៊ីនតោន និងទីក្រុងតេអេរ៉ង់ ដើម្បីបញ្ឈប់អរិភាពក៏ដោយ ក៏ពុំមានវឌ្ឍនភាពជាក់ស្តែងឆ្ពោះទៅរកសន្តិភាពណាមួយបានកើតឡើងនោះដែរ ខណៈការវាយប្រហារជាបន្តបន្ទាប់ និងការបង្កើនកម្លាំងយោធាបានធ្វើឱ្យថយចុះក្តីសង្ឃឹមសម្រាប់ការបន្ធូរបន្ថយភាពតានតឹងយ៉ាងឆាប់រហ័ស។

សង្គ្រាមបានផ្ទុះឡើងនៅថ្ងៃទី២៨ កុម្ភៈ២០២៦ ជាមួយនឹងការវាយប្រហារតាមអាកាសរបស់សហរដ្ឋអាមេរិក-អ៊ីស្រាអែល ទៅលើទីក្រុងតេអេរ៉ង់ និងទីក្រុងតូចធំជាច្រើនទៀតរបស់អ៊ីរ៉ង់។ ចាប់តាំងពីពេលនោះមក ការវាយប្រហារនៅតែបន្ត ដោយកំណត់គោលដៅមជ្ឈមណ្ឌលបញ្ជាការយោធាសំខាន់ៗ រោងចក្រផលិតមីស៊ីល ហេដ្ឋារចនាសម្ព័ន្ធថាមពល និងរោងចក្រនុយក្លេអ៊ែររបស់អ៊ីរ៉ង់ ។

ជាការឆ្លើយតប អ៊ីរ៉ង់បានបើកការវាយប្រហារដោយមីស៊ីល និងយានដ្រូនជាង៨០ លើកប្រឆាំងនឹងអ៊ីស្រាអែល និងមូលដ្ឋានយោធាអាមេរិកនៅទូទាំងមជ្ឈិមបូព៌ា រួមទាំងនៅគុយវ៉ែត បារ៉ែន កាតា ហ្ស៊កដានី អារ៉ាប៊ីសាអ៊ូឌីត និងអារ៉ាប់រួម។

ជម្លោះនេះបានបណ្តាលឱ្យមានអ្នកស្លាប់ និងរបួសយ៉ាងច្រើន ដោយចំនួនអ្នកស្លាប់នៅក្នុងប្រទេសអ៊ីរ៉ង់ត្រូវបានប៉ាន់ប្រមាណថាមានចំនួនជាង ១.៩០០ នាក់ និងរបួសជាង២៤.៨០០ នាក់ រួមទាំងការស្លាប់ដែលបានបញ្ជាក់របស់មេដឹកនាំកំពូលលោក Ali Khamenei មន្ត្រីសន្តិសុខកំពូលលោក Ali Larijani និងរដ្ឋមន្ត្រីក្រសួងចារកម្ម លោក Esmaeil Khatib។ កងកម្លាំងអ៊ីស្រាអែល និងសហរដ្ឋអាមេរិកក៏បានរងការខាតបង់ផងដែរ ដោយមានរបាយការណ៍ថា ជនជាតិអ៊ីស្រាអែលយ៉ាងហោចណាស់ ១៩ នាក់ និងយោធាសហរដ្ឋអាមេរិកចំនួន១៣ នាក់បានស្លាប់៕