ក្រុមបាតុកររាប់ម៉ឺននាក់បានប្រមូលផ្តុំគ្នានៅកណ្តាលទីក្រុងឡុងដ៍្ររបស់ចក្រភពង់គ្លេស កាលពីថ្ងៃសៅរ៍សម្រាប់ការដង្ហែក្បួនប្រឆាំងនឹងក្រុមស្តាំនិយមជ្រុលដែលរៀបចំដោយអង្គការសង្គមស៊ីវិល Together Alliance។ គេក៏បានមើលឃើញក្រុមបាតុករកាន់ផ្ទាំងបដាប្រឆាំងគណបក្សកំណែទម្រង់ចក្រភពអង់គ្លេស (Reform UK )ផងដែរ។ 

ហ្វូងមនុស្សបានដើរតាមដងផ្លូវនានានៃរដ្ឋធានីនេះ ចាប់ពីម៉ោង ១៣:០០នាទីម៉ោងក្នុងស្រុក ដោយកាន់ផ្ទាំងបដាបង្ហាញសារផ្សេងៗ រួមទាំងឈ្លាថា "ប្រយុទ្ធប្រឆាំងនឹងការមិនអើពើលើជនអន្តោប្រវេសន៍" និង "ការប្រកាន់ពូជសាសន៍" ដែលអាចមើលឃើញ។

ឥស្សរជនល្បីៗបានគាំទ្រការតវ៉ានេះ រួមទាំងលោកLenny Henry ជាអ្នកនិពន្ធ និងជាតារាសម្ដែងអង់គ្លេស និងតារាចម្រៀង និងជាតារាសម្ដេងអង់គ្លេសលោកស្រី Paloma Faith ខណៈតារាចម្រៀងលោក Billy Bragg ត្រូវបានគេរំពឹងថានឹងចូលរួម ហើយតារាចម្រៀង និងជាតារាភាពយន្តលោកស្រី Leigh-Anne Pinnock គ្រោងសម្តែងនៅក្នុងព្រឹត្តិការណ៍តន្ត្រីមួយនៅទីលានចតុរង្គ Trafalgar Square។

ការដង្ហែក្បួននេះធ្វើឡើងបន្ទាប់ពីបាតុកម្មមានឈ្មោះថា Unite the Kingdom កាលពីឆ្នាំមុនដែលរៀបចំដោយសកម្មជនស្តាំនិយមជ្រុលលោក Tommy Robinson ដែលបានទាក់ទាញមនុស្សជាង ១សែននាក់ និងបានមើលឃើញឧប្បត្តិហេតុហិង្សាជាច្រើន។

ក្រុមអ្នករៀបចំការដង្ហែក្បួនកាលពីថ្ងៃសៅរ៍បាននិយាយថា មនុស្សរហូតដល់៥០ម៉ឺននាក់បានចូលរួម ទោះនគរបាលក្រុង បានប៉ាន់ប្រមាណថាតួលេខនេះជិត៥ម៉ឺននាក់ក៏ដោយ ដោយបន្ថែមថាតួលេខពិតប្រាកដពិបាកកំណត់ដោយសារតែចំនួនអ្នកចូលរួមតវ៉ាចេះតែកើនឡើង។ក្នុងការប្រមូលផ្ដុំនោះ គេក៏បានមើលឃើញទង់ជាតិអ៊ីរ៉ង់ និងទង់គាំទ្រប៉ាឡេស្ទីនផងដែរ៕