អ៊ុយក្រែន៖ ប្រធានាធិបតីអ៊ុយក្រែនលោក Volodymyr Zelenskyy បាននិយាយថា ប្រទេសរុស្ស៊ីកំពុងប្រមូលផ្តុំកងទ័ពសម្រាប់ការវាយប្រហារថ្មីនៅក្នុងតំបន់ Donbas។ នៅក្នុងសុន្ទរកថាប្រចាំថ្ងៃរបស់លោក Zelenskyy និយាយថា កងទ័ពអ៊ុយក្រែនកំពុងត្រៀមខ្លួនដើម្បីប្រយុទ្ធប្រឆាំងការវាយប្រហារណាមួយ នៅក្នុងតំបន់ឧស្សាហកម្មភាគខាងកើតប្រទេសអ៊ុយក្រែន ជាកន្លែងដែលក្រុមផ្តាច់ខ្លួនគាំទ្រដោយទីក្រុងមូស្គូ បានប្រយុទ្ធជាមួយកងកម្លាំងអ៊ុយក្រែនចាប់តាំងពីឆ្នាំ២០១៤។
លោក Zelenskyy បាននិយាយថា យើងកំពុងត្រៀមខ្លួន ព្រោះយើងនឹងមិនបោះបង់អ្វីទាំងអស់ ហើយយើងនឹងតស៊ូដើម្បីការពារគ្រប់ម៉ែត្រនៃទឹកដីរបស់យើង សម្រាប់ប្រជាពលរដ្ឋគ្រប់រូប។ លោក Zelenskyy និយាយថា កងកម្លាំងរុស្ស៊ីដែលផ្លាស់ទីចេញឆ្ងាយពីទីក្រុងគីវ គឺជាលទ្ធផលនៃការងារអ្នកការពាររបស់យើង ហើយមិនមែនជាការដកថយនោះទេ។ អ្នកនាំពាក្យមន្ទីរបញ្ចកោណលោក John Kirby បាននិយាយថា វាហាក់ដូចជារុស្ស៊ីកំពុងដកកងទ័ពចេញពីទីក្រុងគីវដើម្បីផ្គត់ផ្គង់ និងរៀបចំឡើងវិញ សម្រាប់ការប្រើប្រាស់នៅទីកន្លែងផ្សេងទៀតក្នុងប្រទេសអ៊ុយក្រែន មិនមែនដើម្បីបញ្ជូនកងទ័ពត្រឡប់ទៅប្រទេសរុស្ស៊ីវិញនោះទេ។ នៅក្នុងសុន្ទរកថារបស់លោក Zelenskyy បានអរគុណដល់ប្រធានាធិបតីសហរដ្ឋអាមេរិកលោក Joe Biden សម្រាប់កញ្ចប់ជំនួយមនុស្សធម៌ថ្មី និងជំនួយថវិកាផ្ទាល់បន្ថែមចំនួន ៥០០លានដុល្លារ។ ជំនួយ ៥០០លានដុល្លារបានមកពីថវិកា ១៣.៦ពាន់លានដុល្លារដែលសភាបានអនុម័តកាលពីដើមខែនេះសម្រាប់អ៊ុយក្រែន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
