នាវាពិឃាតបំពាក់មីស៊ីលស៊ីបគោលដៅរបស់កងទ័ពជើងទឹកសហរដ្ឋអាមេរិក USS Gridley បានចូលចតនៅកំពង់ផែ Amador Cruise ក្នុងទីក្រុងប៉ាណាម៉ា កាលពីថ្ងៃអាទិត្យ ទី២៩ ខែមីនា ខណៈនាវាផ្ទុកយន្តហោះ USS Nimitz បានចូលចតនៅក្បែរឆ្នេរសមុទ្រ ជាដំណើរទស្សនកិច្ចលើកដំបូងរបស់នាវាផ្ទុកយន្តហោះសហរដ្ឋអាមេរិកទៅកាន់ដែនទឹកប៉ាណាម៉ាក្នុងរយៈពេលជាង៥០ឆ្នាំមកនេះ។

លោក Kevin Cabrera ឯកអគ្គរដ្ឋទូតសហរដ្ឋអាមេរិកប្រចាំប្រទេសប៉ាណាម៉ា បាននិយាយថា ប្រតិបត្តិការនេះផ្តោតសំខាន់លើការជួញដូរគ្រឿងញៀន និងមានគោលបំណងពង្រឹងកិច្ចសហប្រតិបត្តិការសន្តិសុខក្នុងតំបន់ ដោយចាត់ទុកប្រទេសប៉ាណាម៉ាថាជាមិត្តភក្តិ និងជាដៃគូសំខាន់ក្នុងកិច្ចខិតខំប្រឹងប្រែងនោះ។ សមយុទ្ធរួមគ្នា ត្រូវបានគ្រោងទុកជាមួយប្រទេសអាហ្សង់ទីន ប្រេស៊ីល ឈីលី កូឡុំប៊ី អេក្វាឌ័រ ប៉េរូ ម៉ិកស៊ិក អែលសាល់វ៉ាឌ័រ កាតេម៉ាឡា និងអ៊ុយរ៉ាហ្គាយ។ សមយុទ្ធ Southern Seas 2026 គឺជាសមយុទ្ធលើកទី១១នៅក្នុងតំបន់ ចាប់តាំងពីឆ្នាំ ២០០៧មក។

អាយុកាលបម្រើសេវារបស់នាវា USS Nimitz ថ្មីៗនេះត្រូវបានបន្ថែមពេលដល់ខែមីនា ឆ្នាំ ២០២៧។ នាវាផ្ទុកយន្តហោះនេះ ត្រូវបានដាក់ឲ្យដំណើរការនៅឆ្នាំ១៩៧៥ ដំបូងឡើយត្រូវបានគេគ្រោងនឹងបញ្ឈប់ការប្រើប្រាស់នៅឆ្នាំ២០២៦។ នាវា USS Nimitz មានទំហំធំខ្លាំងក្នុងការឆ្លងកាត់ព្រែកជីកប៉ាណាម៉ា ដូច្នេះនាវាផ្ទុកយន្តហោះនេះត្រូវតែធ្វើដំណើរតាមផ្លូវដ៏វែងឆ្ងាយតាមរយៈ Cape Horn នៅចុងប្រទេសអាមេរិកខាងត្បូង មុនពេលធ្វើដំណើរទៅភាគខាងជើង។