សង្គ្រាមដ៏ក្ដៅគគុកនៅអ៊ីរ៉ង់ កំពុងគំរាមកំហែងដល់ដំណែលនយោបាយរបស់លោកប្រធានាធិបតីអាមេរិក Donald Trump ហើយក្នុងជាមួយគ្នានេះ ការភ្នាល់ផ្នែកនយោបាយក៏កំពុងកើនឡើងផងដែរទៅលើខ្លួនមន្ត្រីជាន់ខ្ពស់ពីររូបរបស់លោក Trump ក្នុងការបោះឆ្នោតប្រធានាធិបតីអាមេរិកឆ្នាំ២០២៨ នោះគឺលោកអនុប្រធានាធិបតី JD Vance និងរដ្ឋមន្ត្រីក្រសួងការបរទេស លោក Marco Rubio។

អ្នកនយោបាយទាំងពីររូបដែលត្រូវអ្នកវិភាគមើលឃើញយ៉ាងទូលំទូលាយថា ជាអ្នកស្នងតំណែងដែលអាចទៅរួច បន្តពីលោក Trump កំពុងប្រឹងប្រែងក្នុងកិច្ចចរចាដែលកំពុងបន្តដើម្បីបញ្ចប់សង្គ្រាមអ៊ីរ៉ង់ ស្របពេលគណបក្សសាធារណរដ្ឋ កំពុងពិចារណាលើអនាគតរបស់បក្សក្រោយសម័យលោក Trump នោះគឺថា តើនរណានឹងអាចក្លាយជាបេក្ខជនប្រធានាធិបតីរបស់បក្ស។

លោក Vance បានប្រកាន់យកវិធីសាស្ត្របែបប្រុងប្រយ័ត្ន ដែលឆ្លុះបញ្ចាំងពីមន្ទិលសង្ស័យរបស់លោកចំពោះយុទ្ធនាការយោធាអាមេរិកក្នុងរយៈពេលយូរ ចំណែកឯលោក Rubio វិញ បានដាក់ជំហរខ្លួនឯងឱ្យស្របគ្នាយ៉ាងជិតស្និទ្ធជាមួយជំហរដ៏តឹងរ៉ឹងរបស់លោក Trump។ លោក Trump ផ្ទាល់ក៏កំពុងថ្លឹងថ្លែងលើរឿងនេះប៉ុន្តែមិនទាន់សម្រេចចិត្តនៅឡើយ ដោយលោកបានលើកឡើងថា មន្រ្តីជំនិតទាំងពីររូបសុទ្ធតែបានចូលរួមក្នុងកិច្ចប្រឹងប្រែងដើម្បីបង្ខំឱ្យអ៊ីរ៉ង់ ទទួលយកការទាមទាររបស់អាមេរិក ក្នុងការរុះរើកម្មវិធីនុយក្លេអ៊ែរ និងមីស៊ីលបាលីស្ទីករបស់ខ្លួន។

ការបោះឆ្នោតប្រធានាធិបតីអាមេរិកបន្ទាប់ នឹងត្រូវធ្វើឡើងនៅឆ្នាំ២០២៨ ហើយច្បាប់កំណត់អាណត្តិ បានរារាំងលោក Trump មិនឱ្យឈរឈ្មោះម្តងទៀតនោះទេ។ ប្រភពផ្ទៃក្នុងបាននិយាយថា ប្រធានាធិបតីរូបនេះបានដាក់សំណួរអំពីអ្នកបន្តវេនទៅកាន់សម្ព័ន្ធមិត្ត និងទីប្រឹក្សាជាលក្ខណៈឯកជនថា «តើគួរជាលោក JD ឬលោក Marco?»។ ក្រុមអ្នកវិភាគនយោបាយ និងមន្ត្រីបក្សសាធារណរដ្ឋបាននិយាយថា លទ្ធផលនៃប្រតិបត្តិការយោធារបស់អាមេរិក អាចនឹងកំណត់អនាគតនយោបាយឆ្នាំ២០២៨ របស់មន្រ្តីជាន់ខ្ពស់ទាំងពីររូបនេះ៕