នៅថ្ងៃចន្ទ (៣០ មីនា) នេះ មេដឹកនាំរបបយោធាមីយ៉ាន់ម៉ា លោក Min Aung Hlaing ត្រូវបានសមាជិកសភាស្នើឈ្មោះលោកជាបេក្ខជនសម្រាប់ការបោះឆ្នោតនៅក្នុងសភា ដើម្បីជ្រើសរើសប្រធានាធិបតីថ្មីនៃប្រទេសដែលកំពុងញាំញីដោយសង្គ្រាមមួយនេះ ខណៈឧត្តមសេនីយ៍ជើងចាស់ដ៏មានអំណាចរូបនេះ កំពុងស្វះស្វែងរកតួនាទីនយោបាយ។

លោក Min Aung Hlaing ដែលបច្ចុប្បន្នក៏កំពុងកាន់តំណែងជាមេបញ្ជាការកងទ័ពមីយ៉ាន់ម៉ាផងនោះ គឺជាឥស្សរជនមួយរូបក្នុងចំណោមពីររូប ដែលត្រូវបានសមាជិកនៃសភាជាន់ទាបទើបនឹងបង្កើតថ្មីរបស់មីយ៉ាន់ម៉ា ដាក់បញ្ចូលឈ្មោះជាបេក្ខភាពអនុប្រធានាធិបតី។

ចំណែកសភាជាន់ខ្ពស់វិញ នឹងដាក់ស្នើឈ្មោះបេក្ខភាពអនុប្រធានាធិបតីមួយរូបទៀត រីឯប្រធានាធិបតីនឹងត្រូវជ្រើសរើសចេញពីក្នុងចំណោមបេក្ខជនទាំងបីរូបនោះ តាមរយៈការបោះឆ្នោតរួមគ្នារវាងសភាទាំងពីរ គឺសភាជាន់ទាប និងសភាជាន់ខ្ពស់ ដែលកាលបរិច្ឆេទនៃការបោះឆ្នោត មិនទាន់ត្រូវបានប្រកាសនៅឡើយទេ។ ដំណើរការជារួមគឺ បេក្ខជនបីរូបត្រូវតែងតាំងជាបេក្ខជនអនុប្រធានាធិបតី ហើយតំណែងប្រធានាធិបតីក៏នឹងត្រូវជ្រើសរើសចេញពីបេក្ខភាពទាំងបីរូបនេះដែរ។

ចំណាត់ការនេះកើតឡើង បន្ទាប់ពីការបោះឆ្នោតដ៏ចម្រូងចម្រាសមួយដែលបានប្រព្រឹត្តទៅកាលពីខែធ្នូ និងខែមករា ស្របពេលមានជម្លោះដ៏ក្ដៅគគុក។ ក្នុងការបោះឆ្នោតសកលនោះ បានមើលឃើញគណបក្សសាមគ្គីភាព និងអភិវឌ្ឍន៍សហភាព (USDP) គាំទ្រដោយយោធា ទទួលបានជ័យជម្នះ ប៉ុន្តែត្រូវបានអង្គការសហប្រជាជាតិ និងប្រទេសលោកខាងលិចជាច្រើន រិះគន់យ៉ាងខ្លាំងថាជាការបោះឆ្នោតបង្គ្រប់កិច្ច ឬជាការបោកប្រាស់៕